Ҳаҭыр зқәу Беслан Фиодор-иҧа!
Ареспубликатә ауажәларратә еиҿкаара «Аҧсадгьыл» аилазаара гәык-ҧсыкала шәымшира шәыдырныҳәалоит!
Ишәзеиӷьаҳшьоит агәамч, агәабзиара, аманшәалара шәнапы злаку аусқәа зегьы рҿы.
Шәара иахьа шәыҧсҭазаара ашәымҭа шәҭагылоуп, Аҧсны ӡырызго, ҧхьаҟа изго, зымчи-зылшеи иамеигӡо аҧсуа политикцәа шәреиуоуп. Иуадаҩӡаз аамҭақәа инадыркны, иахьа уажәраанӡа шәабиҧара ишаҵанакуа ала, шәыжәлар рымаҵ аураҿы аџьабаа рацәаны иазыжәбахьеит.
Аабыкьа Аҧсны имҩаҧысыз, иуадаҩыз аҳәынҭқарра ахада иалхра апроцесс даҽазныкгьы агәра ҳнаргеит шаҟа шәполитикатә культура ҳараку, иҵаулоу шәыпрофессионалтә дыррақәа. Уи арҵабыргуеит напхгара зышәҭоз аоппозициа иатәыз алхратә штаб хада аус еиҿкаара, аиҧыларақәа рҿы ажәлар рҟынӡа инажәгарц ишәҭахыз агәҭакқәа инагӡаны, уаҩышәала рызнагашьа шәахьақәшәоз. Ҳара агәра ҳгоит аимак-аиҿак зцыз урҭ ахҭысқәа уаҩ игәы иамыхәашаз мҩала ицарц шалшоз, шәара шәҟәыӷареи шәыхшыҩи цхыраагӡан иҟамлазҭгьы.
Абас еиҧш иҟоу аҟазшьа бзиақәа роуп ахаангьы Аҧсынра еиқәзырхоз, ҧхьаҟа изгоз, еизҳазыӷьартә иҟазҵоз.
Иахьа шәымшира шәыдныҳәало, иаҳҭахуп Аҧсны шьардаамҭа шәагымхо, ҳаҧхьаҟа ишьҭоу аус дуқәа зегьы рҿы шәшаҳбац шәыӷәӷәаны шәаҳбаларц. Агәра ҳгоит уи ус егьшыҟало.
Ҽааныбзиала шәнеилааит!
С днем рождения, Беслан Федорович!