Аҧыза-министр Валери Бганба ашьапылампыл азы Аҧсны ачемпионат актәи аикәшара амҩаҧгаразы аҧара азоужьразы аусҧҟа инапы аҵаиҩит
Аҧсадгьыл-инфо, ноиабр 10 ноября 2018 ш. Абҩарҵәыреи аспорти рзы Аҳәынҭқарратә еилакы ашьапылампыл азы ачемпионат миллионбжак еиҳаны аҧара азоурыжьырц адҵа арҭеит. Арҭ аҧарақәа нас Аҧсны аиҳабыра рфонд аҟынтәи ирыздырхынҳәырц ргәы иҭоуп.
Аусҧҟаҿы иаҳәоит абҩарҵәыреи аспорти рзы Аҳәынҭқарратә еилакы ашьапылампыл азы Аҧсны ачемпионат актәи аикәшара мҩаҧыргарц азы Ашьапылампылтә федерациа иазоунажьыр шаку аилак 2018 ш. рзы имҩаҧнагаран иҟоу аусқәа рзы ирзоужьыз аҧара аҟынтәи 544 800 мааҭ. Анаҩс ари аҧара аиҳабыра рфонд аҟынтәи ихадырҭәаауеит ҳәа иақәдыргәыӷуеит.
Аусҧҟа иацы анапы аҵаҩын. Иахьа иалагеит ачемпионат. Актәи ахәмарраҿы гәдоуҭатәи «Риҵа» 5:0 ҳәа иаиааит аҟәатәи «Динамо» аҿы. Ҩ-мпылк ҭаиршәит Сослан Гочуа, акака – Аинар Гамсаниа, Саид Кәарацхелиа, Феликс Гәыбаз.
Ачемпионат актәи атур хыркәшахоит ноиабр 12 рзы. Ноиабр 11 рҽны галтәи «Самырзаҟан» иаднакылоит аҟәатәи «Нарҭ», ноиабр 12 рзы еиҧылоит «Гагреи» «Афони». Ахәмаррақәа ирылагоит асааҭ14 рзы.
Ашьапылампыл азы 26-тәи ачемпионат сентиабр азы иалагаран иҟан, аха аҧара ахьрымамыз иахҟьаны изныкымкәа иахыргахьан.