Ашьапылампыл азы Аҧсны акубок агаразы 25- тәи ахәмаррақәа ирылагаран иҟан август 20 рзы.
Аҧсадгьыл-инфо, август 26 2018 ш. Аҟәатәи «Нарҭ» Феисбук адаҟьаҿы иаанацҳауеит Ашьапылампылтә федерациа апрезидент Џьума Кәарацхьелиа Аҧсны акубок агаразы ахәмаррақәа сентиабр ахь ишиагахо азы акомандақәа реиҳабацәа шрылеиҳәаз. 26-тәи Аҧсны ачемпионат акәзар, иалагараны иҟоуп октиабр азы.
«Нарҭ» иаанацҳауеит иааиуа ачемпионат аҿы ф-командак шракуу иқәгыларан иҟоу – Аҟәатәи акомандақәа «Нарҭи» «Динамои», гудоуҭатәи «Риҵа», галтәи «Самырзаҟан», «Гагра», «Афон».
«Макьаназ иҵәаху информациоуп ахәыҷқәа рыбжьара аҧхьахә агаразы аицлабрақәа ҟалоу иҟамлоу. Макьана уи азы акагьы рҳәом аҭакҧхықәра зду аусбарҭақәа - Аҵарадырра аминистрра, Абҩарҵәыреи аспорти рзы Аҳәынҭқарратә еилакы, Ашьапылампылтә федерациа. Ҳааҧшып, еиҵагылоу аҿар рзы ихәыцуа ауаа рычҳара хыҵаанӡа», - ҳәа аҳәоит «Нарҭ» иҟанаҵаз аҳәамҭаҿы.
Убри аан акоманда ашьапылампылтә сезон ҿыц аҽазыҟаҵара иаҿуп.
Август 25 рзы астадион «Динамо» аҿы ирыдыркылеит галтәи «Самырзаҟан», иагьыриааит 3:0 ҳәа. Ҩ-мпылк ҭаиршәит Алан Кәыҵниа, мпылк Шабаҭ Логәуа.