Иун азы Аҧсны ирӷьычыз Петербургтәи абизнесмен Максим Иаковлев иахьа Пулково аеропорт аҿы дтәеит.
Аҧсадгьыл-инфо, октиабр 7 2018 ш. Иара иоушьҭразы ацәгьауцәа 200 млн мааҭ рҭахын. Уажәы иара изыҧшуп Санкт-Петербургтәи аусҭҵааратә комитет аҟны. Уаҟа иул азы абизнесмен иӷьычразы ашьауӷатә ус хацыркын, аанацҳауеит «Фонтанка».
Аҭыжьымҭа иамоу аинформациа ала, Афон Ҿыц иун 20 рзы ирӷьычыз абизнесмен дызҭаз аҳаирплан ашьыжь, октиабр 7 рзы Пулково аҳаирбаӷәаза аҟны итәеит.
Аофициалтә версиа ала, 53 ш. зхыҵуа Максим Иаковлев хҩык абџьар змаз ацәгьауцәа Афон Ҿыц иҟоу Afon Resort Hotel аҟынтәи дырӷьычит. Аусҭҵааҩцәа дзыҩназ ауадаҿы аҧара рацәаны ирбеит. Ацәгьауцәа абизнесмен иргьежьразы 200 млн мааҭ рҭахын. Ирҳәоит иара иҩызцәа рахь аҧара еизыргарц азы ашәҟәы иҩит ҳәа. Аҧара аизгаразы иара диҳәеит ТРК «Гранд Каньон» зтәу Мусса Екзеков. Уи иареи ианстудентцәаз инаркны еииҩызцәоуп, аанацҳауеит «Фонтанка».
Максим Иаковлев Петербург еицырдыруа бизнесменуп. Имоуп анаплакы «Полиграфоформление», ТРК «Гранд Каньон» ахәҭак иара итәуп, убас Кировтәи азауад акционерс дыҟоуп.
Уаанӡа ателеканал «360» иаанацҳауан Аҧсны ибжьаӡыз ахолдинг «Полиграфоформление» аиҳабы Максим Иаковлев иашьа Константин Чечентәыла аиҳабы Рамзан Кадыров иахь аҳәара шыҟаиҵаз иашьа иҧшаараҿы ацхыраара ирҭарц азы.
Иун 20 2018 ш. рзы Гәдоуҭа араион апрокуратура Урыстәыла атәылауаҩ Михаил Николаи-иҧа Иаковлев иӷьычра инамаданы ашьауӷатә ус хацнаркит.