Аҧсны ахада инапынҵақәа назыгӡо Валери Бганба Аслан Бжьаниа ахада иалхрақәа рҿы иигаз аиааира идиныҳәалеит.
«Гәык-ҧсыкала ишәыдысныҳәалоит. Шәыгәра ргеит. Шәылшара рбеит. Шәылшара рацәахо Анцәа иҟаиҵааит аҳәынҭқарра аргылараҿы, ҳажәлар ирыхәо аҿы. Ишәзеиӷьасшьоит ақәҿиарақәа», - иҳәеит Валери Бганба.
Аслан Бжьаниа иазгәеиҭеит алхратә процесс ибзиан ишымҩаҧысыз.
«Ари алхратә процесс мҩаҧысит ибзианы. Рацәак уаҩы дамыргәамҵӡеит. Ахыркәшарагьы ҧшӡахеит. Уи аус иаужьны ицазҭгьы, ус иалҵӡомызт. Ари изықәнагаз ауаа рџьабаа адуп. Шәџьабаа адуп. Убри аҟнытә иҭабуп ҳәа шәасҳәарц сҭахуп. Ишәывагылан аус зус, абри зегьы азакәан ҧшра аҭан имҩаҧызгаз, убарҭгьы иҭабуп ҳәа сызрашәҳә. Нас ҭагылазаашьак ҟалар, саргьы ирасҳәоит. Сара сызлахәаҧшуа ала, шамахамзар, имҩасыз апроцесс згәамҧхо аӡәы дыҟоуп ҳәа сгәы иаанагаӡом - ишеиҿкаази, нас ишеилгазгьы», - ҳәа азгәеиҭеит Аслан Бжьаниа.
«Иаҳаракгьы, ишеилгаз. Даараӡа ҭабуп заҳәатәу шәареи шәҩызцәеи роуп. Избанзар, ҧсуаҵас шәазнеит, азакәан мацарала акәымкәа, ҧсуаҵас шәызегьы шәныҟәеит. Аҵыхәтәангьы иаҳнарбеит ҧсуаҵас зегьы ҳшеилгаз. Ԥшӡала ҳаҧхьаҟа иаҳҧыло Анцәа иҳәааит. Ажәлар реидкылараҿы убри даара иус дуны иҟашәҵеит», - иҳәеит Валери Бганба.