Боливариантәи Ареспублика Венесуела иҟоу Аҧсны ацҳаражәҳәаҩ Заур Гәаџьаа Аҧсны аибашьраҿы аиааира агара 25 шықәса ахыҵреи Аҧсны ахьыҧшымра азхаҵара 10 шықәса ахыҵреи ирызкныы адкылара мҩаҧигеит
Аҧсадгьыл-инфо, октиабр 22 2018 ш. Адкыларахь ааҧхьара рыман Венесуела адәныҟатәи аусқәа рминистрреи амилаҭтә ассамблеиа рхаҭарнакцәа, Венесуела иҟоу Никарагуа, Шьамтәыла, Боливиа, Алжир, Катар, Гаити, Ирак рыцҳаражәҳәаҩцәа.
Ацҳаражәҳәаҩ Заур Гәаџьаа иқәгылараҿы ирзеиҭеиҳәеит Қырҭтәылеи Аҧсни реибашьра аҭоурых, ҳҳәынҭқарра ахьыҧшымра аиоуразы изнысыз амҩа, Урыстәыла Аҧсны ахьыҧшымра азхаҵара атәы.
«Ари ахҭыс акыр шәышықәсатәи аҭоурых змоу ҳҳәынҭқарразы аҵак ду змоу рыцхуп. Уи иунарбоит иахьа Аҧсны иазхаҵоу ҳәынҭқарраны ишыҟоу. Аха убри аамҭазы Қырҭтәыла Аҧсны ашәарҭара иҭанаргылоит иахьагьы. Дара рылахуп НАТО имҩаҧнаго аҽазыҟаҵарақәа. Қырҭтәыла мап ацәнакуеит аҭынчразы адокумент анапы аҵаҩра. Иаҭаххар, Аҧсны арбџьармчқәа ирылшоит агрессиа аҭак аҟаҵара», - иҳәеит ацҳаражәҳаҩ иқәгылараҿы.
Иара иазгәеиҭеит Аҧсни Венесуелеи рыбжьара аусеицура арҭбаара ишазҿлымҳау, убри азы Каракас Аҧсны ацҳаражәҳәарҭа аофис ҿыц шаарту.
«Аҧсни Венесуелеи реиҳабырақәа рыбжьара акультура аганахьала аусеицуреи латиноамерикантәи ателеканал «Телесури» ААТРК русеицуреи рзы аиқәшаҳаҭрақәа рнапы аҵаҩын. Иахьазы иаздырхиоит аспорти аҵарадырреи рганахьала аусеицуразы аиқәшаҳаҭрақәа», - иҳәеит ацҳаражәҳәаҩ.