Маи 20 рзы Аҧснытәи аҳәынҭқарратә университет аҟны имҩаҧгахоит "Абызшәа ашҭа" зыхьӡу апроект, аанацҳауеит ААУ аинформациеи амедиакоммуникациақәеи рыҟәша.
Уи еихшоуп ҩ-етапк рыла. Актәи аетап азы ауниверситет аҧсуа секторқәа ирҭоу астудентцәа зегьы рхы аладырхәуеит адиктант аҩра, иара убасгьы аурыс сектор иҭоу аҧсшәа здыруагьы (хатәгәаҧхарала).
Аусмҩаҧгатә азкуп аҧсуа литература ашьаҭаркҩы Д. И. Гәлиа диижьҭеи 150 ш. аҵра. Адиктант атекстгьы шьақәыргылоуп ашәҟәыҩҩы ирҿиамҭақәа ирылхны. Абри атәы лҳәеит ААУ аинформациеи амедиакоммуникациақәеи рыҟәша аинтервиу азҭаз ауниверситет Алингвистикеи аинформациатә хархәагақәеи рцентр анапхгаҩы, ААУ аҭҵаараус апроректор, афилологиатә ҭҵаарадыррақәа рдоктор, апрофессор Џьульетта Адлеиба.
Апроректор лажәақәа рыла, ишьақәыргылоуп адиктант иалахәхараны иҟоу рсиа, хыҧхьаӡарала дара 548-ҩык рҟынӡа ыҟоуп.