Аҧсадгьыл-инфо, иул 16 2018 ш. Август 6 рзы РУСДРАМ аҿы имҩаҧгахоит Урыстәыла жәлар рартист Евгени Книазев иқәгылара. Абри атәы ааицҳаит Искандер итеатр адиректор хада Иракли Хынҭәба ипресс-конференциаҿы.
“Евгени Книазев амоноспектакль “Казанова” ала дықәгылоит. Ари Вахтангов итеатр аҿы иқәыргылаз Михаил Улианов, Иури Иаковлев, Евгени Книазев ахьыхәмаруаз аспектакль «Три возраста Казановы» агәаларшәара ауп.
Амоноспектакль аҿы иалахәхоит Михаил Алхазов напхгара зиҭо амузыкатә коллектив “Каприччио”.
Иракли Хынҭәба убас иҳәеит октиабр азы Искандер итеатри Аҟазаратә театри (Санкт-Петербург) русеицура инамаданы ари атеатр Аҟәаҟа иаауеит.
“Араҟа ҵыҧх аспектакльқәа “Том Соиер”, Аҳақьым қәыҧш ишәҟәқәа” қәҿиарала рықәгылара ашьҭахь сынтәа иааргоит х-спектакльк. Акы еицырдыруа “Тартиуф” ауп. Уи режиссиорс дамоуп Григори Козлов. Аппаратуреи адекорациақәеи уантәи иааргоит. Убас иаҳдырбоит амелодрама “Абзиабаратә шҟәқәа”, ахәыҷтәы спектакль “Ахәыҷи Карлсони”, - иҳәеит атеатр адиректор хада.
Аплан иаламҵаӡакәа, атеатр аусура бзиа азы 2018 ш. рзы дара “Агостроль дуқәа” захьӡу Урыстәыла акультура аминистрра апрограмма иаларҵеит. Убри алагьы РУСДРАМ октиабр азы Краснодари Маиҟәаҧи агастрольқәа раҧхьа ишьҭоуп.
Иракли Хынҭәба ирылаиҳәеит даҽа ажәабжь ҿыцкгьы. Уи азкуп атеатр аҿы аҿар рааӡара аганахьала ирыдыркылоу аусқәа ртәы.
“Ҳтеатр аҿы ҭагалан инаркны иаартхоит Ахәыҷтәы театралтә студиа. Уаҟа ахәыҷқәа адраматә ҟазара, авокал, акәашара рганахьала адырра роулоит. Ҳара дҳамоуп актиорра анаҩсгьы ирежиссиору Џьамбул Жорданиа. Иара ахәыҷқәа ибзиан аус рыцушьа идыруеит. Ҳара иқәҳаргылалоит ахәыҷқәа рбаҩхатәра ахьаадырҧшыша амиузиклқәа” – иҳәеит Иракли Хынҭәба.
Атеатр 38-тәи асезон азы даҽа ҿыцракгьы алагалахоит – Искандер итеатр арт-фоие.
“Ҳтеатраҿы иҟалоит ҩ-сценак – ихадоу асценеи арт-фоиеи. Уажәазы иқәыргылоуп алашаратә ферма, иҟаҳҵеит шә-ҭыҧк зкуа аплатформа. Атеатр арт-фоие иаиоуеит арепертуар, уаҟа имҩаҧрыгалоит аҟазаратә хәылҧазқәа, амоноспектакльқәа, аконцертқәа. Ари апроект алыршоуп ҳаспонсор – акомпаниа “А-мобаил” ацхыраарала”, - иҳәеит Иракли Хынҭәба.
РУСДРАМ 37-тәи атеатралтә сезон октиабр 21 рзы аспектакль “Ахәмарҩы” дырбарала ихыркәшахоит.