Аҧсны аҩныҵҟатәи аусқәа рминистрра, иара иаҵанакуа ҷыдалатәи аусбарҭақәа рҟны, азакәаншьаҭа змоу апориадок ашьақәыргылара азы ихадароу ауснагӡатәқәа аднакылоит, аанацҳауеит Аҩныҵҟатәи аусқәа рминистрра асаит.
Аминистр Гарри Аршба Дранда аҳаблан иҟоу арежимтә обиектқәа дырҭааит, ауаа аамҭалатәи рыҧхьакырҭа аусуреи, насгьы аусеилыргаратә ҧхьакырҭеи рҟны аҩныҵҟатәи аиҿкаара аҧҟарақәа иахьынӡарықәныҟәо агәаҭареи, ҷыдалатәи аусбарҭақәа рматериал-техникатә еиқәыршәареи, уа аус зуа регламентла ирзышьақәыргылоу анапынҵақәа шынарыгӡои ргәаҭара азы.
Агәаҭарақәа раан Аҧсны аҩныҵҟатәи аусқәа рминистрра аусеилыргаратә ҧхьакырҭа ахь анашьҭратә режими, аҩныҵҟатәи аиҿкаареи рганахь ала имаҷымкәа аилагарақәа аарҧшын.
Аминистр Гарри Аршба идҵала рмаҵзуратә уалҧшьақәа рынагӡара аҟынтәи рхы иақәиҭтәуп аусеилыргаратә ҧхьакырҭа аиҳабыи, арежими ахьчареи рыҟәша аиҳабыи. Арҭ ауаа аҩныҵҟатәи аусқәа русбарҭақәа рҟны аҧхьаҟатәи русура азҵаара ӡбахоит амаҵзуратә усеилыргара ашьҭахь.
«Аусеилыргаратә ҧхьакырҭа аусзуҩцәа рмаҵзуратә уалҧшьақәа ишахәҭоу еиҧш инарыгӡалар ауп хамеигӡарак ҟамҵакәан, ари асистема аҟны аилагарақәа аҭыҧ рымамзар ауп»,- ҳәа азгәеиҭеит аҩныҵҟатәи аусқәа рминистр.
Аусеилыргаратә ҧхьакырҭа аушьҭра-гәаҭаратә ҭыҧ ианахыслак анаҩс амаҵзуратә уадақәа рҟны анеиааирақәа зегьы аҭакзыҧхықәу аҷаҧшьаҩы ашәҟәы иҭеигалозар ауп. Иҭакыу рахь анеира азин змоу, мамзаргьы урҭ рхәы назго ауаа рзы ишьақәыргылоуп изықәныҟәалатәу ҷыдалатәи аграфики аҧҟарақәеи.
Аусеилыргаратә ҧхьакырҭа аҟны азакәантә пориадоки аҩныҵҟатәи арежими рышьақәыргылара азы, Гарри Аршба аминистрра аппарат хадеи, ақалақьқәеи араионқәеи русбарҭақәа реилазаара аҟынтә аҭакзыҧхықәу аусзуҩцәа рахьтә гәыҧҩык ари аобиект ахь рмаҵзуратә уалҧшьақәа рынагӡаразы инаишьҭит.