Ашәаҳәаҩ Афорум аартраҿы дықәгыларц ааҧхьара лырҭеит аиҿкааҩцәа.
Аҧсадгьыл-инфо, сентиабр 18 2018 ш. Мадина Кәарацхьелиа Владивосток имҩаҧгаз Мрагыларатәи аекономикатә форум аусура алагара иазкыз агәырӷьаратә дкылара аалыртит.
«Даара аинтерес аҵан. Сара сзы игәырӷьара дуун Афорум аартраҿы сықәгылара. Елка, агәыҧқәа Burito, Jukeвox Trio реиҧш иҟоу рыцықәгылара сара сзы акараҵанакуеит. Сашәаҳәара зегьы иргәаҧхеит. Уи сара сзы даара ихадоуп», - Мадина Кәарацхьелиа лцәанныррақәа ртәы лҳәеит Аҧсадгьыл-инфо иалҭаз аинтервиу аҿы.
Иара Афорум ахаҭа ахьымҩаҧысуаз Владивосток ақалақь ашәаҳәаҩ қәыҧш даара илгәаҧхеит.
«Владивосток аҭаара аҟынтәи иҧхоу ацәаныррақәа сзаанхеит. Ҳара ҳанхон акруизтә лаинер Costa neoRomantiсa. Ҳҿаҧхьа Владивостоки Афорум ахьымҩаҧысуаз адгьылбжьаха Русскии еимаздо Ахтәы цҳа ыҟан. Ақалақь ахь аекскурсиақәа ҳзымҩаҧыргон. Владивосток даара иҧшӡоу қалақьуп», - лҳәеит ашәаҳәаҩ.
Владивосток Мрагыларатәи аекономикатә форум мҩаҧыргоит 2015 ш. раахыс. Сынтәа уи иалахәын 6000 инареиҳаны 60 ҳәынҭқарра рҟынтәи аделегатцәа.