РУСДРАМ аспонсор хада, актиорцәа 13-ҩык атруппаҿы изыҟоу, «Ҳаџьы-Мураҭ» апремиера уҳәа ртәы далацәажеит Иракли Хынҭәба ипресс-конференциаҿы.
Афактқәа мацара
37 атеатралтә сезон азы, уи иалагеит октиабр 2017 ш. рзы «Ревизор» апремиера ала, РУСДРАМ аҿы ирыхәмархьеит 72 репертуартә спектакль. Иҷыдоу апроектқәа зегьы 90 рҟынӡа инаӡоит. Иракли Хынҭәба иажәақәа рыла, аплан изларбоу ала, сентиабр азы ихыркәшахоу сынтәатәи асезон азы ирыхәмарран иҟоуп 108 спектакль.
Зынӡа Иракли Хынҭәба атеатр адиректор хадас дыҟоуижьҭеи РУСДРАМ аҿы иқәдыргылахьеит 178 репертуартә спектакль, 13 премиера ҭрыжьхьеит.
«Ари аҩыза алҵшәақәа даҽа театрк иаанарҧшхьеит ҳәа ӡәыр иҳәозар, уи аинформациазы иҭабуп ҳәа расҳәоит. Ари аҩыза алҵшәақәа макьаназ аӡәгьы имам. Профессионалла зус иазнеиуа ҳколлектив уи азы иҭабуп ҳәа расҳәоит», - иҳәеит Иракли Хынҭәба.
Убри аан, ас еиҧш алҵшәақәа шаадырҧшуагьы,аҳәынҭқарра аҟынтәи аҧара ироуа 2018 ш. рзы иацымлеит ҳәа азгәеиҭеит адиректор хада.
«240 нызқьҩык ауааҧсыра ахьынхо аҳәынҭқарраҿы, ҳтеатр иаҭааит 30 н. ахәаҧшцәа. Ас еиҧш иҟоу алҵшәа аныҟала, аҳәынҭқарра аҟынтәи аҧара иҳауа иацырҵоит ҳәа агәыӷра сыман, аха уи ус иҟамлеит. Иааиуа ашықәс азы уи алыршахап ҳәа ҳгәыӷуеит», - иҳәеит Хынҭәба.
Егьырҭ аҳәынҭқаррақәа рҿы ахәаҧшцәа рацәаны изҭаауа атеатрқәа аҳәынҭқарра аҟынтәи ацхыраара шроуа азгәеиҭеит.
«Ҳара ҳҿы ус иҟам. Шаҟа ирацәаны иурҳауа аҟара, ргәы иаанагоит изрыцхраатәузеи ҳәа. Ари азнеишьа иашам, уи аперспектива змам, хара амхәыцроуп иаанаго. Аҳәынҭқарра аҩныҵҟеи анҭыҵи арепутациа ҭызго атеатр ацхыраара аҭатәуп»,- ҳәа игәы иаанагоит Иракли Хынҭәба.
Иара иҳәеит дара идырҳаз аҧара ала акоммуналтә усбарҭаҿы ирықәыз ауал шыршәаз, уи иартәоит 500 н. мааҭ.
13-ҩык злоу атруппа
«РУСДРАМ атруппа зегь реиҳа имаҷуп Аҧснытәи атеатрқәа рыбжьара - 13-ҩык роуп иҟоу. Аҿартә театр аҿы акырӡа еиҳауп. Ҳара ҳтеатр акәзар, акырӡа еиҳаны аспектакльқәа ықәҳаргылоит. Аӡәгьы игәы иалсыр сҭахӡам, аха ари фактуп. Сара исҭахуп аштатқәа ҳзацырҵарц. Ас иҟалом, ари абсурдуп»,- иҳәеит Иракли Хынәҭба.
2019 ш. рзы аштатқәа рзацырҵар, иара дазхиоуп даҽа хәҩык идкылара.
«Сара проблема сымаӡам, актиор Аҧсуа театр дахыҧхьаӡалазар, убри аан ҳара ҳҿы ароль иҭара. Рыцҳарас иҟалаз, уи аҩыза апроблемақәа ыҟоуп Аҧсуа драматә театр аҿы. Уа аиҳабы ҿыц дарҭеит, сгәыӷуеит уи апроблема ӡбахап ҳәа. Ауаа ҩажәа шықәса асценахь ицәырымҵӡац, аха убри аан мап ацәыркуеит ҳтеатр аҿы ахәмарра. Ари аҩыза ҟамлароуп. Актиор данымыхәмаруа – дактиорӡам», - иҳәеит РУСДРАМ адиректор хада.
Аиубилеитә спектакль
Сынтәатәи асезон азы атеатр аҿы афбатәи апремиера ҟалоит иул 17-18 рзы. Уи Реи Куин икомедиа «Клинически случаи» акәхоит. Аспектакль режиссиорс дамоуп «Примадонны» ықәзыргылаз Сергеи Ефремов.
Иракли Хынҭъба иазгәеиҭеит иул 20 рзы ирыхәмаруа аспектакль «Ревизор» Аҧсны зҽаҧсазтәыз артистка Наталиа Папасқьыр лиубилеи ишазыркуа.
«Сеигәырӷьоит аҵыхәтәантәи ашықәсқәа рзы иахьцәырҵуа лара лбаҩхатәра иашьашәалоу аспектакльқәа. Аҧхьаҟагьы лара ароль бзиақәа лзыҧшуп, аха актриса уи атәы макьана илыздырӡом», - иҳәеит адиректор.
Аамҭа аикәшара: Ақаҩба - Џьапуа – РУСДРАМ
Декабр азы атеатр аҿы иҟалоит даҽа премиерак.
«Иаҳҭаххеит аамҭа еикәҳаршарц. 90-тәи аш. рзы атеатр аҿы аус руан, уажәы Урыстәыла аус зуа, абаҩхатәра змаз ауаа. Урҭ 20 ш. атеатр ашә ихымҵӡац. Сара исҭаххеит урҭ ҳара ҳҿы аспектакльк ықәдыргыларц. Сара Адгәыр Ақаҩба иоуп сызҿу, уажәы Орсктәи атеатр асахьаркыратә напхгаҩыс иҟоу»,- иҳәеит Иракли Хынҭъба.
Арежиссиор Адәгыр Ақаҩба Аурыс театр аҿы аус иуан 1983 ш. инаркны 1994 шықәсанӡа, нас Москваҟа дцеит.
«Даара ибзиаӡан исгәалашәоит Виолетта Маан дахьыхәмаруаз Аҧсуа театр аҿы иқәдыргылаз Миллер ипьеса «Спуск с горы Морган» ала аспектакль. Сгәы иалоуп уи ирласны арепертуар иахьалырхыз. Убри аспектакль аҿы асахьаҭыхҩы-ақәыргылаҩыс дыҟан Баҭал Џьапуа. Иара 1995 шықәсанӡа Аурыс театр аҿы асахьаҭыхҩы хадас дыҟан, уи ашьҭахь 25 ш. атеатр ашә дхымҵӡац. Иара атеатр ахь уаҳа дузнагаӡом ҳәа сарҳәон, аха сара издыруан мап шиимкуаз, избанзар иара дтеатрал уаҩуп.
Адгәыр Ақаҩбеи Баҭал Џьапуеи РУСДРАМ аҿы Лев Толстои иповест «Ҳаџьы-Мураҭ» ала аспектакль ықәдыргылоит.
«Ари акрызҵазкуа хҭысуп, избанзан ари аҩымҭа џьаргьы иқәдмыргылаӡац. Знызаҵәык Бақәатәи аварцәа ртеатр аҿы иқәдыргылахьан. Асовет аамҭақәа рзы Георги Данелиа аекран ахь ицәыригарц акәын, аха уи залмыршахеит.
Иракли Хынҭәба иҳәеит аспектакль «Ҳаџьы-Мураҭ» апремиера декабр 17-18 рзы ишазгәаҭоу.
«Зегьы бзиоуп. П,хьаҟа ҳцоит. Аспонсорцәа ҳацхраауеит, аха спонсор хадас атеатр иамоу ахәаҧшцәа роуп, - иҳәеит Иракли Хынҭәба.