Аҧсуа шьапылампыл асҩы Витали Дараселиа диижьҭеи сынтәа 61 шықәса ҵит.
Аҧсадгьыл-инфо, октиабр 13 2018 ш. Очамчыра дыргәаладыршәеит аҧсуа шьапылампыл алегенда Витали Дараселиа. Иара дахьжу инеит иҩызцәа, ауаажәларра, очамчыратәи аҧшьбатәи ашкол аҵаҩцәа. Дара роуп ашьапылампыл асҩы имемориал аҿы арыцқьарақәа рымҩаҧгара зыбзоуроу. Уи азы ашколхәыҷқәа араион ахадара рыхьӡала иҭабуп ҳәа раҳәан.
СССР зҽаҧсазтәыз аспорт азҟаза Витали Дараселиа диит октиабр 9 1957 ш. рзы Очамчыра. Уаҟа ауп ампыл асра дахьалагазгьы. Актәи азыҟаҵаҩыс диман Бондо Какәыбаа. 17 шықәса анихыҵуаз Витали Дараселиа дгәеиҭеит Қарҭтәи «Динамо» акоманда аиҳабы Нодар Ахалкаци, дагьигоит икомандахь.
1980-1981 шш. рзы Европатәи Акубокқәа ркубок агаразы афинал аҿы инеит Қарҭтәи «Динамо». АУаҟа ирықәшәеит Германиатәи «Карл-Цеисс». 1:1 шыҟаз, ахәмарра анҵәара х-минуҭк шагыз, Витали Дараселиа иҭаиршәуеит ампыл, убри алагьы раҧхьаӡа акәны «Динамо» ари акубок агоит.
1982 ш. рзы Витали Дараселиа машәырла дҭахоит. Иара зыҧсҟы икыз амашьына амҩа иахҟьаны, иҳаракыз ацаҟьа иалҟьаны иҭаҳауеит. Аперспектива ду змаз, СССР еизгоу акомандазы ихәмаруаз ашьапылампыл асҩы имҩа абасала иҿахҵәеит.
Витали Дараселиа иҭынхеит ҩыџьа ахәыҷқәа – иҧа Витали, иҧҳа Кристина.
Очамчыра дынхоит Витали иан Мери Бжьаниа – Дараселиа.