Октиабр 3 рзы Шәача ихыркәшан СССР Афырхаҵа Мартирос Нагулиан игәалашәара иазкыз 2005-2007 шш. рзы ииз аспортсменцәа рыбжьара Урыстәылазегьтәи иаарту атурнир.
Аҧсадгьыл-инфо, октиабр 4 2018 ш. Аҧсны акоманда ахьӡала иқәгылеит дзиудо азы еизгоу акоманда азыҟаҵаҩ Андреи Погосов хадара ззиуаз Аҟәатәи аспортсменцәа.
«Аҧснытәи акоманда ари атурнир иалахуп иҳаҩсыз ашәышықәса 80-тәи ашықәсқәа раахыс. Иахьагьы атурнир ахь акомнадақәа рацәаны иаауеит. Уажәазы ҳара фҩык аспортсменцәа ҳаман ҳцеит, хәҩык урҭ рахьынтә аҧхьахәқәа роуит. Алҵшәа уиаҟара исгәаҧхом, аха рықәгылара сгәаҧхоит. Дара ибзиан рхы аадырҧшит», - иҳәеит азыҟаҵаҩ Андреи Погосов.
40 кьыла иҟоу аҭыҧҳацәа рыбжьара актәи аҭыҧ лгеит Лорена Симонова (азыҟаҵаҩ Саид Адлеиба)
73 кьыла иҟаз рыбжьара аҩбатәи аҭыҧ ааникылеит Артур Шахмеликиан. Ахҧатәи аҭыҧқәа ргеит Александра Симонова (36 кг), Саид Ҷкотуа (55 кг), Давид Ԥациа (66 кг).
Мартирос Нагулиан игәалашәара иазкыз атурнир иалахәын 21 команда, 300-ҩык инареиҳаны аспортсменцәа.