Абри атәы рҳәеит ConIFA аделегациеи ДНР ахада инапынҵақәа назыгӡо Денис Пушилини реиҧылараҿы.
Аҧсадгьыл-инфо, сентиабр 26 2018 ш. Донецктәи ареспубликаҿы иҟоу ConIFA аделегациа астадионқәа «Донбасс Аренеи» «Олимпиискии» ирҭааит.
Аделегациа иалоуп ConIFA апрезидент Пер Андерс Блинд, уи ихаҭыҧуаҩ Дмитри Пагава, Аҧсны аолимпиатә комитет апрезидент Валеи Аршба, Аҟәатәи «Динамо» апрезидент Асҭамыр Адлеиба.
«Аспорттә инфраструктура азхиоуп иарбанзаалак аицлабрақәа рымҩаҧгара. Донецк ақалакь цырцыруеит», - иҳәеит Асҭамыр Адлеиба астадионқәа «Донбасс Аренеи» и «Олимпиискии» ианырҭаа ашьҭахь.
ConIFA аделегациа идикылеит ДНР ахада инапынҵақәа назыгӡо Денис Пушилин. Аиҧылараҿы ареспубликаҿы ConIFA атурнирқәа рымҩаҧгара атәы иалацәажәан.
Ари аиҧылараҿы убас, маи 2019 ш. рзы Донецктәи «Донбасс Аренаҿы» Аҧсни ДНРи еизгоу ркомандақәа реиҧылара мҩаҧыргарц рҳәеит.
Асҭамыр Адлеиба Аҧсадгьыл-инфо ахь ишааицҳаз ала, уаҵәы аделегациа ЛНР ицоит, уаҟагьы аспорттә инфраструктура иахәаҧшеит.