Иахьа Аҟәа иҟаларан иҟоу Аҧсни Нигериеи ркомандақәа реицыхәмарра иазкын Sputnic Аҧсны имҩаҧгаз апресс-конференциа.
Аҧсадгьыл-инфо, август 8 2018 ш. «Зегьы ашьапылампыл ахь шәааҳаҧхьоит. Сгәыӷуеит, ахәмарра агәахәара бзиа шәнаҭап ҳәа», - иҳәеит Аҧсны акоманда азыҟаҵаҩ Беслан Аџьынџьал.
Иара иажәақәа рыла, аҧышәа змоу рнаҩсангьы, раҧхьаӡа акәны еизгоу акомандазы ихәмаруагьы ыҟоуп.
«Мчыбжьык аҽазыҟаҵарақәа ҳарҿын. Ахәмарра шаҟа ҳазхиоу, аиҧылара иунарбоит. Хымҧада, иаҳҭахуп ҳаиааирц, нигериаагьы убас. Уи азы ҳалшарақәа зегьы ҳхы иаҳархәоит», - иҳәеит азыҟаҵаҩ.
Аспорти абҩарҵәыреи рзы Аҳәынҭқарратә еилакы аиҳабы Баграт Хәытаба иазгәеиҭеит дара аиҩызаратә еиҧылара амҩаҧгаразы ажәалагала анроу гәахәарыла ишрыдыркылаз.
«Иҟаларан иҟоу ахәмарра – аспорт аҿиара акыр иацхраауеит, жәларбжьаратәи аҩаӡарахь ацәырҵра иахәоит. Аполитика аларымгалар рымуит, аха ус акәзаргьы, ахәмарра ҟалоит», – иҳәеит Хәытаба.
Аурыс-африкатә аспорттә ассоциациа аиҳабы Вадим Боико иазгәеиҭеит аспорт аполитика алагалара шаҭахым.
«Ианцәажәо зегьы ирҳәоит аспорт аполитика ишалам, аха аус аҿы иаабоит ус шакум. Уажәы уи рхы иадырхәоит Урыстәылеи, уи ибзиан иазыҟоу аҳәынҭқаррақәеи рганахьала. Ҳара идҳарбарц ҳҭахуп аспорт аполитика ишалаҵәҟам. Кавказтәи ҳҩызцәа рыбзоурала Нигериатәи акоманда Урыстәыла аиҩызаратә хәмаррақәа акыр мҩаҧнагоит. Аҧсны ашьҭахь Чечентәыла ҳцоит. Имҩаҧааго аиҧыларақәа адунеи ауаажәлар иднарбоит иҭышәынтәалам арегион ҳәа изышьҭоу аҿы иҟоу аҭагылазаашьа зынӡа ишыцәгьам, араҟа ишынхо асасцәа ибзиан издызкыло ауаа», - иҳәеит Боико.
Нигериатәи акоманда ахаҭарнакцәа ирҳәеит Аҧсныҟа иаха ишааз, уи азы ҳкоманда ашьапылампыл асцәа рабадырра иахьымӡаӡеит.
«Ҳкоманда сақәгәыӷуеит, ахәмарра бзиа шааҳарҧшуа агәра згоит, - иҳәеи Нигериатәи акоманда акапитан Саиди Опеими. – Шәача ааигәа ҳааит, мчыбжьык ҵуеит аҽазыҟаҵарақәа ҳарҿуижьҭеи, убри аганахьала Аҧсны акомандеи ҳареи ҳҭагылазаашьақәа еиҧшуп».
Аҧсни Нигериеи ркомандақәа реиҧылара мҩаҧысуеит иахьа, астадион «Динамо», 18 сааҭ рзы.