«Ҳара Лондонҟа ҳцеит адунеи ачемпионцәа рстатус ҳаманы, даҽа алҵшәақәакгьы ҳрықәгәыӷуан. Аха, рыцҳарас иҟалаз, ҳара иҳалымшеит ҳҿаҧхьа иқәҳаргылаз алҵшәақәа раарҧшра. Уи зегьы схахьы изгоит, сара соуп азыҟаҵаҩ хада», – иҳәеит «Спутник Аҧсны» имҩаҧысыз апресс-конференциаҿы Беслан Аџьынџьал.
Иара иажәақәа рыла, есышықәса еиҳахоит ConIFA имҩаҧнаго атурнирқәа рыҩаӡара.
«Иаахтны исҳәоит: ҳара атурнир аҿы зегь реиҳа ҳаӷәӷәӷаӡамызт. Ҳара ҳаасҭа иӷәӷәан Карпаталиеи Аҩадатәи Кипр акомандақәа, команда бзиақәан Паданиеи, Амраҭашәаратәи Ермантәылеи, Пенџьаби. Ҳара атурнир ҳҽазыҟаҳҵалароуп даҽакала. Иахьазы аҽазыҟаҵаразы иҳамоу 10-12 – мш роуп. Сара азыҟаҵаҩцәа геницәа рхыҧхьаӡараҿы сыҟазаргьы, сара ус схы сыҧхьаӡаӡом, сыцхыраацәеи сареи акоманда атурнирқәа разыҟаҵара ҳцәыцәгьоуп, дара рыҩаӡара ахьышьҭыҵуа азы», – иҳәеит Беслан Аџьынџьал.
Аиҿкааратәи афинанстә проблемақәеи ирыхҟьаны еизгоу Аҧсны акоманда Лондонтәи адунеи ачемпионат иалагаанӡа 12 – мш шыбжьаз ауп аҽазыҟаҵаразы ианеизаз. Убри адагьы, акоманда акапитанс иҟаз Анри Ҳагушь ачемпионат ахь дзымцаӡеит. Урыстәыла дахьыхумаруа акоманда аиҳабацәа даурмыжьӡеит Лондонҟа.
«Сара сзы уи даара ихьанҭахеит. Иара иҟамзаара акоманда даара ианыҧшит. Анри Ҳагушь аҧышәа змоу шьапылампыл асҩуп. Иара дыхәмархьеит Ачемпионцәа рлигаҿы, иахьазы аҧсуа шьапылампыл асцәа рыбжьара Урыстәыла ачемпионат иреиҳау алигаҿы ихәмаруа иараӡәк иоуп», – иҳәеит азыҟаҵаҩ.
Аҧсны еизгоу акоманда еизоит шықәсык ахь знык, ConIFA атурнирқәа ралагамҭаз. Ачемпионат алагара хәымш шыбжьаз ауп Англиаҟа авизақәа шрырҭоз анеилкааха. Ари аҭагылазаашьагьы ахәмарцәа ирнымҧшыр ауамызт ҳәа игәы иаанагоит Беслан Аџьынџьал.
«Ҳара зегьы аҟаҵара ҳалагоит аҵыхәтәантәи аминуҭазы. Исыздырам, уи зыхҟьоу, аҵыхәтәаны азҵаарақәа зегьы ҳаӡбоит. Ус иҟамзар ауп. Амилаҭтә команда азҵаара даҽакала иахәаҧштәуп. Акоманда шықәсык ахь ҧшьынтә еизалар ауп, хәымш ирыдамхаргьы, имҩаҧгалатәуп аиҩызаратә еиҧыларақәа. Уи азы Ашьапылампылтә федерациа даҽа лшарақәак амазар ауп. Еизгоу акоманда алҵшәақәа аанарҧшларц ҳҭахызар, аиҿкааратә усқәа даҽакала ҳрызнеироуп», – иҳәеит азыҟаҵаҩ.
Беслан Аџьынџьал ConIFA 2018 аҿы Аҧснытәи акоманда ақәгылара иазҿлымҳаз зегьы, ажурналистцәа, иҭабуп ҳәа реиҳәеит, иаҳаракгьы Лондон инхо аҧсуа диаспора ахаҭарнакцәа. Дара акоманда аеропорт аҿы ирҧылеит, есыҽны ахәмаррақәа ахьымҩаҧысуаз астадион аҿы инеиуан абираҟқәа рыманы, уи анаҩсгьы акоманда ахьынхоз ирҭаауан.
«Дара ҳахәмаррақәа зегьы ирыхәаҧшуан. Астадион ахь анеира ҩ-сааҭк еиҳаны иақәдырӡуан. Дареи ҳареи ирацәаны ҳаицәажәон, аҵыхәтәаны аҳамҭақәа ҳарҭеит», – иҳәеит Беслан Аџьынџьал.
Азыҟаҵаҩ хада акомандаҿы аҭагылазаашьа бзиа ыҟоуп ҳәа дахәаҧшуеит.
«Ашьапылампыл асцәа адәаҿы адагьы, аҧсҭазаараҿгьы еиҩызцәоуп, еицхыраауеит. Ҳкоманда даара еилаҵәоу коллективуп», – иҳәеит Беслан Аџьынџьал.
Аинформациа азы: ConIFA 2018 аҿы Аҧсны акоманда агәыҧ Б аҿы ирықәшәеит Карпаталиеи, Аҩада Кипри, Тибети ркомандақәа. Тибеттәи акоманда 3:0 ҳәа иаиааины ҳкоманда 0:2 ҳәа иаҵахеит Карпаталиаа рҿы, еиҭахарала (2:2) ҳәа ихдыркәшеит Аҩада Кипрааи дареи реицыхәмарра, убри алагьы агәыҧ аҟынтәи изымцаӡеит. Атурнир аҿы ҳкоманда даҽа х-хәмаррак мҩаҧнагеит, иагьыриааит ахҧагьы, уи иалҵшәаны 16 команда рыбжьара ажәбатәи аҭыҧ ааннаклыеит.
Ачемпионат афинал аҿы еиқәшәеит иара агәыҧ Б иатәыз акомандақәа – Карпаталиеи Аҩадатәи Кипри. ConIFA 2018 иаиааит Карпаталиа.
Аҧсны еизгоу акоманда ConIFA атурнирқәа рҿы иқәгылоит 2014 ш. раахыс. 2016 ш. рзы ConIFA адунеи ачемпионат Аҧсны имҩаҧган, ҳкоманда аиааирагьы агеит.
ConIFA (Confederation of Independent Football Associations) – Ихьыҧшым ашьапылмпылтә конфедерациақәа рассоциациа, иаҧҵан иун 7 2013 ш. рзы. Еиднакылоит FIFA иалам ашьапылампылтә федерациақәа.
Аштаб-квартира ыҟоуп ақалақь Лулео (Швециа).