Аиҩызаратә еиҧылара иалагаанӡа август 2008 ш. рзы Қырҭтәыла Алада Уаҧстәыла ианақәла иҭахаз минуҭктәи ҿымҭрала иргәаладыршәеит.
Аҧсадгьыл-инфо, август 8 2018 ш. Аҧсны еизгоу аҿар ркомандеи Нигериатәи астудентцәа еизгоу ркомандеи реиҧылара иахәаҧшырц иааз ауаа астадион «Динамо» атрибуна хада дырҭәит.
Ахәмарра актәи амнуҭқәа инадыркны аҧыжәара ргеит ҳшапылампыл асцәа. А-14-тәи аминуҭ азы Ҭемыр Агрба актәи ампыл ҭаиршәит, 37-тәи аминуҭ азы Виктор Пимпиа аҩбатәи.
Аҩбатәи азбжазы ҳкоманда ашьапылампыл асцәа даҽа ҩынтә амба агара рылшеит. Ампылқәа ҭадыршәит Инал Ҷкадуеи Саид Кәарацхелиеи.
Аҧсны акоманда азыҟаҵаҩ ицхырааҩ Беслан Гәыблиа иҳәеит Нигериаа рыхәмарра атәы зынӡа ишырзымдыруаз, убри азы алҵшәа атәы аҳәара цәгьан.
«Аҽазыҟаҵараан ауп иахьаҳбаз акоманда, еилаҳкааит урҭ рыҩаӡара зынӡагьы ишыҳаракымыз. Ахәмарра алҵшәа уи атәы аҳәоит. Амба агаразы аҭагылазаашьақәагьы рымаӡамызт. Аҩбатәи азбжазы знызаҵәык уи иазааигәан, аха амбахьчаҩ Шамиль Цушба изы уи ампыл аанкылара уадаҩрак амоуит», - иҳәеит Беслан Гублиа.
Иара ас еиҧш иҟоу аиҧыларақәа рҿы ашьапылампыл асцәа аҧышәа бзиа роуеит ҳәа игәы иаанагоит.
«Ари ҳара ҳзы акры аҵанакуеит, аҧышәа ҳнаҭоит. Раҧхьаӡа акәны ҳара FIFA иалоу аҳәынҭқарра акоманда ҳрыцхәмаруан», - иҳәеит азыҟаҵаҩ.