Аҧыза-министр Валери Бганба «Апальма иаҧырхагоу ахәаҷа-маҷақәа Аҧсны раларҵәара алмыршаразы» аусҧҟа инапы аҵаиҩит
Аҧсадгьыл-инфо, ноиабр 2 2018 ш. Аҧсны аҳәынҭқарра аҳәаа ала апальмақәа риагара алдмыршарц азы Аҳәынҭқарратә аҳазалхратә еилакы анапы ианҵоуп.
Аҩныҵҟатәи аусқәа рминистрра аҳәыҭавтоинспекциеи аҵиаақәа ркарантин азы Аҳәынҭқарратә инспекциеи амҩаду «П,соу-Егры» аҿы апальмақәа рымҩангара алмыршара рнапы ианҵоуп.
Араионқәеи Аҟәа ақалақьи радминистрациақәа аҧхынтәи акафе-абунгалоқәа рҿы апальма амахәқәа рхы иадмырхәарц азы иахылаҧшлароуп.
Аусҧҟа анапы аҵаҩуп апальмақәа ирҧырхагоу ахәаҷа-маҷақәа Аҧсны раларҵәара аанкылазарц, аекологиатә шәарҭадара алыршареи, Аҧсны адекоративтә культурақәеи реиқәырхареи рзы. Абри атәы аанацҳауеит Аминистрцәа реилазаара апресс-маҵзура.