Аҧсны аҩбатәи ахада Сергеи Багаҧшь инышәынҭра ахьыҟоу аҭыҧ адгьыл аҳәазара анкылоуп. Абри атәы ааицҳаит «Аҧсныҟәарарӷәӷәара» аиҳабы Игор Казанба.
Декабр 19 рзы аҭыҧ даҭаан игәеиҭеит аҧыза-министр Валери Бганба.
Ари аҭыҧ аҿы адгьыл аҳәазара зыҟьаз аилкаара цәгьоуп, рҳәоит аспециалистцәа.
«Аҭыҧантәи аиҳабацәа изларҳәо ала, ари аҩыза араҟа аамҭа-аамҭала иҟалалаоит. Уи адагьы, араҟа ауахәама андыргылоз адгьыл хыхьтәи ахәҭа ықәыргеит. Убри ашьҭахь уаҟа иқәҟьаны ицоз аӡы, ҵаҟа адгьыл иалало иалагеит, анаҩс адгьыл аҳәазо иалагеит», - иҳәеит «Аҧсныҟәарарӷәӷәара» аиҳабы.
Багаҧшьаа рҭаацәа адгьыл мҳәазарц азы аҭӡы аргылара рхала иалагеит, уи иабзоураны иалыршахеит ауахәама ааигәара адгьыл аҳәазара аанкылара, аха уи азхомызт. Адгьыл амемориал аганахьала аҳәазара иалагеит.
«Аусура ду мҩаҧгоуп. Ҳара акотлованқәа аажит, уаанӡа идыргылаз арӷәӷәагатә ҭӡы еиҧш даҽа ҩ-ҭӡык ҳаргылеит. Аихақәа ыҵаҳарсит. Аусурақәа 4 миллионки 400 нызқьи инарзынаҧуа иахҭынҵан», - иҳәеит Игор Казанба.
Иара излеиҳәаз ала, ари аҭыҧаҿы аусурақәа рымҩаҧгара 2016 ш. рзы иазгәарҭахьан, аха ҩымз раҧхьа урҭ ирылагартә еиҧш алшара аныҟалаз.
Афото: Аминистрцәа реилазаара