Аҵиаақәа ркарантин азы Аҧсны Аҳәынҭқарратә инспекциа аиҳабы Аркади Џьынџьиа аинформациатә-массатә хархәагақәа Аҧснынтәи Урыстәылаҟа ааглыхратә аалыҵ аиагараҿы иҟаз аанкыларақәа аҧыхуп ҳәа иҟаиҵаз аҳәамҭа Россельхознадзор акомментари ҟанаҵеит
Аҧсадгьыл-инфо, октиабр 19 2018 ш. Россельхознадзор аҿы ирҳәоит ас еиҧш иҟоу аҳәамҭа макьана аҟаҵара шзаау, иахьазы уаанӡа иҟаз аҧҟарақәа ишрықәныҟәатәу.
«5 кьылак еиҳау аалыҵ Аҧснынтәи Урыстәылаҟа иахыгазарц алшоит аекспорт ҟазҵо аган аспециалистцәа уи атауар ангәарҭалак ашьҭахь, Аҵиаақәа ркарантин азы Аҧсны Аҳәынҭқарратә инспекциа ирынаҭаз афитосанитартә шәҟәы ацзар. Ас еиҧш иҟоу аҧҟарақәа шьақәыргылоуп Аҧсны абты амҽхак ахьарҭбааз азы», - аҳәоит Россельхознадзор иҟанаҵаз аҳәамҭаҿы.
Убас анаплакы аҿы иазгәарҭоит Аҧсны абты ақәхразы аусмҩаҧгатәқәа шцогьы, макьаназы иара Урыстәылаҟа анеиразы ашәарҭара шыҟоу.