Август 1994 шықəса инаркны маи 2014 шықəсанӡа Зоиа Аҩӡба Аҧсны аҳəынҭқарратə статистика аусбарҭа деиҳабын.
Аҧсадгьыл-инфо, 25 иул 2018 ш. Аҧсны гəыкала иазыҟаз апрофессионал лаҳасабала длыхцəажəеит Зоиа Аҩӡба уаанӡатəи атəыла аҧыза-министр Леонид Лакербаиа.
«Зоиа Аҩӡба – ибзиоу асоветтə ҵараиурҭа дапрофессионалуп. Кыршықəса аҳəынҭқарратə статистика аусбарҭа дахагылан, аспециалистцəа аӡəырҩы еиҵалааӡеит. Лара лаан раҧхьаӡа акəны имҩаҧган Аҧсны иқəынхо ауаа рҭаҩра, насгьы аҩныҵҟатəи азеиҧш аалыҵ ҧхьаӡан. Зоиа иҟалҵеит убас, астатистикатə дыррақəа ауаа ирылаҵəартə. Уаанӡа уи аҩыза ыҟамызт», - иҳəеит Лакербаиа.
Иара иазгəеиҭеит Зоиа Аҩӡба лхаан ишҭыжьыз астатистикатə еизга «Абхазия в цифрах».
«Уажəгыь уи атрадициа иацырҵоит. Аизга иануп инҭырҳəыцааны аинформациа, ацифрақəа зегьы ирызкны – заҟа хəыҷы ииз инаркны шаҟа ҧаҭлыка аҩы ҭрыжьыз аҟынӡа. Аизгақəа – аекономика, адемографиа уҳəа ҭызҵаауа рзы хархəага бзиоуп, - иҳəеит Леонид Лакербаиа. Лыҟазшьа хьанҭазар ауан, ажурналистцəеи лареи реимадараҿы, иара аусура ахаҭаҿгьы, аха лҟазара ҳаракын. Даара сгəы иалоуп уи аҩыза ауаҩы дахьҳаҧхаз».
Гагратəи араион астатистика аусбарҭа аҟəша аиҳабы Валентина Бавина Зоиа Аҩӡба длабадырит 1975 шықəсазы Аҧснытəи АССР астатистикатə усбарҭаҿы аусура даналага.
«Зоиа Аҩӡ-ҧҳа лус лдыруан. Аибашьра ашьҭахь Аҧсны астатистика ашьаҭа лкит, избанзар адокументқəеи аматериалқəеи зегьы Аџьынџьтəылатə еибашьра иалаӡит. Атəыла араионқəа зегьы рҿы астатистика аҟəшақəа аалыртит, - лҳəеит Валентина Бавина. – Аибашьра ауаҩы игəабзиара ааха анаҭоит, ахыхь лнаҭеит».
Иҟəыҕоу рҵаҩык иаҳасабала длыхцəажəеит уаанӡатəи леиҳабы Аҳəынҭқарратə статистика аусбарҭа аусуҩ Мариетта Минасиан.
«Сара 16 шықəса ҵуеит астатистика аусбарҭаҿы аус зуеижьҭеи, сааит арахь ахəбатəи акурс аҿы аҵара анысҵоз. Зоиа Цуна-иҧҳа сымҩақəылҵон, исыҵалҳəон исыгыз, лҧышəа сымалдон. Аусура самҵырц анақəыскуаз, саанылкылон: «Ибықəманшəалахоит! Бызцои», ҳəа. Напхгаҩык иаҳасабала ллеишəа цəгьан, аха иаҳдыруан уи аус ишазеиҕьхоз», - лҳəеит Минасиан.
Аҳəынҭқарратə статистика аусбарҭа аусзуҩцəа дыгəцаракны дыргəаладыршәоит Зоиа Аҩӡба.
«Алафгьы бзиа илбон. Аусура анҭыҵ анаҩсгьы, ҩызасгьы, бжьгаҩысгьы даҳзыҟан. Иаҳдыруа зегьы лара илҿыҳҵааит. Иацы аахыс ҳшьара ҳзықəлом, убри аҟара ҳгəы ҳахьит лыҧсҭазаара дахьалҵыз. Ариаҟара аенергиеи алахҿыхреи злаз ауаҩы адунеихаан дыҧсып ҳəа угəы иаанагомызт», - азгəалҭеит Асида Симониа.
Уи лажəақəа рыла, Аҳəынҭқарратə статистика аусбарҭаҿы Зоиа Аҩӡба аус анылуаз, лколлектив зныкымкəа Ауадҳара ҧсшьара илгахьан.
«Лыҧсҭазаарагьы далҵит бзиа илбоз аҭыҧқəа рҿы. Зоиа Аҩӡба иаҳзеиҭалҳәон ашьхарахь аныҟəара агəыбылра шылиркыз лаб, раҧхьаӡа данхалоз ҩы-шықəса шылхыҵуаз, Пыв ашьхахыҵырҭа аҭоурых, аҳаракырақəа руак «Аҩӡаа раҳаракыра» ҳəа ишашьҭаз», - илгəалалыршəоит Асида.
Лколлегацəа ргəы иаланы ирҳəон кыршықəсатəи лыпрофессионалтə усура азы Зоиа Аҩӡба ишланашьамыз аҳəынҭқарратə ҳамҭақəа.
«Лара лакəымкəа, ҳара ҳазыҧшын уи, избанзар даҧсан, избанзар ҩынтə лара лнапхгарала имҩаҧган Аҧсны иқəынхо ауаа рҭаҩра. Есышықəса, август 22, лымш ира аҽны аҭел ҳалзасуан. Уажəшьҭа уи аҩыза ҟалом», -дқəыҧсычҳаны иазгəалҭеит аусбарҭа аусзуҩы.
Зоиа Аҩӡба диит август 22, 1952 шықəсазы.
70-тəи ашықəсқəа раан Аҧснытəи АССР астатистикатə усбарҭаҿы аус луан аекономист еиҳабыс. 1983-1992 ш. – Аҧсны аҳəынҭқарратə статистика аҟəша аиҳабыс, август 1992 шықəсазы Аҧсны анапхгара аекономикатə комиссиаҿы.
Август 1994 шықəса инаркны маи 2014 шықəсанӡа Зоиа Аҩӡба Аҧсны аҳəынҭқарратə статистика аусбарҭа деиҳабын.