Аҧсадгьыл-инфо, сентиабр 9 2018 ш. Урыстәыла аҧыза-министр Дмитри Медведев Аҧсны аиҳабыра рхада Геннади Гагәылиа иҭахара инамаданы адышшылара ҟаиҵеит. Абри атәы аанацҳауеит Урыстәыла аиҳабыра рхада исаит.
Адышшыларатә телеграммаҿы иаҳәоит:
«Урыстәыла аиҳабыра рыхьӡалеи, хаҭала сыхьӡалеи амҩатә машәыр иҟалаз иахҟьаны Аҧсны аҧыза-министр Геннади Гагәылиа иҭахара инамаданы гәалсра дула сшәыдышшылоит. Иазгәасҭарц сҭахуп аҩ-ҳәынҭқаррак реиҩызаратә еизыҟазаашьақәеи реимадареи рҿы Геннади Леонид-иҧа илагала шырацәоу. Иара аиҳабыра рхадараҿы иусуреи асоциал-економикатә усеицуразы аҩ-ҳәынҭқаррак реиҳабырақәа ркомиссиа ахантәаҩы иаҳасабалеи аҩ-ганк рыбжьара иактуалтәу азҵаарақәа рыӡбараҿи, аинвестициатәи агуманитартәи проектқәа рӡыргареи рҿы илагала дууп».