Ноиабр 8 рзы Аԥснытәи аҳәынҭқарратә университет аҟазарақәа рфакультет аҟны имҩаԥысит VII Жәларбжьаратәи арт-пленер «Аԥсны ҭагалантәи ашәыгақәа 2022» алахәылацәа адипломқәеи аҳаҭыртә шәҟәқәеи ранашьара ацеремониа. Апленер мҩаԥысуан октиабр 3 инаркны 12-нӡа, сынтәа иара азкын ААУ 90 шықәса ахыҵра, аанацҳауеит ААУ аинформациеи амедиакоммуникациақәеи рыҟәша.
Аҟазарақәа рфакультет адекан инапынҵақәа назыгӡо Нугзар Логәуа иазгәеиҭеит: «Ҳара ҳзы сынтәатәи апленер даара акраҵанакуан, избанзар уи мҩаԥган ҳҵараиурҭа аиубилеитә шықәса аҳаҭыраз, убри аҟнытә ирацәаҩын ҳтәыла анҭыҵ, Урыстәыла арегионқәа рҟнытәи иаҳзааз асасцәа».
Нугзар Логәуа иажәақәа рыла, арт-пленерқәа рымҩаԥгара хықәкыс иамоуп асахьаҭыхыҩцәа ҿарацәа рзанааҭтә ҩаӡара аизырҳара, рҵара иалагӡаны ироуа атеориатә дыррақәа апрактикаҿы рышьақәырӷәӷәара, аҧышәа аимдара.
«Аҟазарақәа рыҟәша сынтәа факультетны аҟалара еиҳагьы арҵаҩцәеи астудентцәеи аҭакԥхықәара ду рыднаҵоит», - иазгәеиҭеит афакультет анапхгаҩы.
Нугзар Логәуа ҷыдала иҭабуп ҳәа реиҳәеит апленер аиҿкаареи амҩаԥгареи рҿы ахы инаркны аҵыхәанӡа аџьабаа збаз зегьы.
VII Жәларбжьаратәи арт-пленер «Аԥсны ҭагалантәи ашәыгақәа 2022» алҵшәақәа рыла 35-ҩык астудентцәа рнапаҿы ирыҭан адипломқәеи аҳаҭыртә шәҟәқәеи. Иара убасгьы аҳамҭақәа ранашьан аҟазарақәа рфакультет арҵаҩцәа.
Аусмҩаԥгатә рхы аладырхәит ААУ аҟазарақәа рфакультет арҵаҩцәеи астудентцәеи.
