Ноиабр 6 2018 шықәса рзы Аҧсуа телехәаҧшра 40 шықәса ахыҵит
Аҧсадгьыл-инфо, ноиабр 5 2018 ш. Ареспубликатә ауаажәларратә еиҿкаара «Аҧсадгьыл» Аҧсуа телехәаҧшра аколлектив аиубилеи рыдырныҳәалоит.
«40 шықәса раҧхьа, ноиабр 6 1978 шықәса рзы, Аҧсны иқәынхо ателербагақәа рыла аҧсшәа раҳарц, аҭыҧантәи ажәабжьқәа аҧсышәала ирарҳәалартә еиҧш алшара роуит. Ари амш иазыҧшыижьҭеи акрааҵуан. Ахҭыс алыршахеит аҧсуа жәлар рмилаҭтә қәҧара активистцәа рыбзоурала», - аҳәоит адныҳәаларатә шәҟәаҿы.
«Аҧсадгьыл» ахаҭарнакцәа Аҧсны аибашьраан Аҧсуа телехәаҧшра аусзуҩцәа профессионалла рхы шаадырҧшыз азгәарҭоит.
«Дара рпрофессионалтә уалҧшьа анагӡара анаҩсгьы абџьар шьҭыхны аҧсадгьыл ахьчаразы игылеит. Аибашьраан иҭахаз ажурналистцәа ргәалашәара аҿаҧхьа ҳхырхәоит», - азгәарҭоит «Аҧсадгьыл» ахаҭаранкцәа.
Аҧсуа телехәаҧшра ахәаҧшцәа зегьы рзы аинтерес аманы иҟаларц рзеиӷьаршьоит.
«Иахьа, адунеи иццакны ианеиҭаҵуа аамҭазы, аиелехәаҧшра аинтерес аҵазароуп, обиективла аинформациа узнанагозар ауп, ауаажәларра зегьы рҭахрақәа ирықәшәозар ауп. Амилаҭтә еиқәшаҳаҭра алыршаразы ателехәҧшра ароль дууп. Аҧсуа телехәаҧшра аефирахь ацәырҵра иазыҧшу ауаа рхыҧхьаӡара иагымхаларц рзеиӷьаҳшьоит», - аҳәоит адныҳәалараҿы.
https://apsadgil.info/roo-apsadgil/news/apsadgyl-pozdravlyaet-abkhazskoe-televidenie-s-yubileem/