Аҧснытәи аҳәынҭқарратә университет В. П. Анқәаб ихьӡ зху Аҧсуа-адыга филологиа ацентри Аедыгь филологиеи акультуреи рфакультети рыбжьара иҟоу аусеицуразы аиқәшаҳаҭра инамаданы, мшаҧымза 18-19 рзы афилологиатә факультет ажурналистика аҟәша 3 акурс астудент Милена Сниатовскаиеи аҧсуа бызшәеи алитературеи рзанааҭ 2 акурс астудент Камилла Кархалааи рхы аладырхәит Маиҟәаҧ ақалақь, Адыгьеиатәи аҳәынҭқарратә университет аҟны имҩаҧысуаз астудентцәа 64-тәи рыҭҵаарадырратә конференциа.
Рықәгыларақәа рҟны ирзааҭгылеит Дырмит Гәлиа илагала аҧсуа хәыҷтәы литература аҿиара аҟни агазеҭ "Аҧсны" ашьақәгылара аҭоурыхи. Астудентцәа рыҭҵаарадырратә напхгаҩы - В. П. Анқәаб ихьӡ зху аҧсуа-адыга филологиа Ацентр аиҳабы Ахра Анқәаб.
Астудентцәа қәҿиарала рықәгыларазы иранашьан аҳаҭыртә шәҟәқәеи аҳамҭақәеи.
Иазгәаҭатәуп, Аедыгь филологиеи акультуреи рфакультет астудентцәа рыбжьара ишыҟаз аҧсуа шәҟәыҩҩцәа рырҿиара иазкыз атемақәагьы.
Аедыгь литература акафедра аиҳабы Н. А. Хамерзокова лнапхгарала иқәгылеит хҩык астудентцәа: Игорь Филин ("Художественный мир Владимира Платоновича Анкваб"); Аминета Хагундокова ("Жизнь и творчество Баграта Шинкуба"); Арина Додильнаиа ("Дмитрий Гулиа - "Первопроходец" абхазской литературы").
Абри атәы аанацҳауеит ААУ аинформациеи амедиакоммуникациақәеи рыҟәша.