Иахьа жә-шықәса ҵит иҧсҭазаара далҵиижьҭеи аҩбатәи Аҧсны Ахада Сергеи Уасил-иҧа Багаҧшь.
Сара иахьагьы даара исцәыуадаҩуп Сергеи Уасил-иҧа Багаҧшь ииасхьоу аамҭала ихцәажәара. Аҧсны дагхеит зыҧсадгьыл гәыкала бзиа избоз ауаҩы, еснагь, дахьыҟазаалакгьы, уи ацхраара иашьҭаз, лҳәоит Аҳәынҭспорткомитет аспорттә ҟәша аиҳабы Жанна Занҭариа Аҧсны аҩбатәи ахада дылгәалашәо.
«Ирацәаӡоуп Сергеи Уасил-иҧа иҟаиҵаз Аҧсны азыҳәан, аха сара аспорт ахырхарҭа сазааҭгыларц сҭахәуп. Ихьанҭаз аибашьра ашьҭахьтәи аамҭақәа рзы иара азҿлымҳара аиҭон аспорт аиҭарҿиара, еиҳаракгьы амҵәышәымпыл аҿар адиҧхьалон. Амҵәышәымпыл азы Афедерациа данахагыла ашықәсқәка раан, иара Аҳәынҭқарратә еилахәыра «Амшынеиқәафымцамч» деиҳабын. Ҳара ҳиҳәан днаҳгеит уи Афедерациа ахадарахьы. Иара акыр дшеилахазгьы, спортсменк иаҳасаб ала, амҵәышәымпыл азы Афедерациа иамаз ауадаҩрақәа еилкааны, ҳазиҳәаз азы мап ҳцәиимкӡеит. Уахь даннеи инаркны напы алеикит ари аспорт хкы ашьҭыхра, аизырҳара, илшо зегьы ҟаиҵон аспортә школқәа мпылла реиқәыршәареи, амҵәышәымпыл ахәыҷқәа радыҧхьалареи, урҭ рахьҽазыҟарҵаша аҭыҧқәа реиҿкаареи рзы», - илгәалашәоит Жанна Занҭариа.
Анаҩс Сергеи Багаҧшь аҳәынҭқарра ахадас даныҟала, аспорт ашьҭыхра аус иацҵан. Жанна Занҭариа илҳәоит усҟан иара ишиҭаххаз Афедерациа анапхгараҭара аанижьырц, аха иҟарҵаз аҳәара дахаҵгылеит.
«Сергеи Багаҧшь ибзоурала амҵәышәымпыл аспорт аларҵәара бзиа аиуит, хыҧхьаӡара рацәала аҿар уи иазхьаҧшит. Анаҩс, ҳалагеит Аҧсны анҭыҵ имҩаҧысуаз аиндаҭларақәа рыҽрылархәра. Аҧсны акоманда аицлабрақәа ишрылахәу анеилыркаалак, Қырҭтәылаа аҧынгылақәа ҳауртә еиҧш иҟарҵон. Аха Сергеи Багаҧшь еснагь илшон ицәырҵуаз азҵаарақәа рыӡбара, ҳаспортсменцәа рхы аадырҧшыртә еиҧш алшарақәа рыҭара. Еиуеиҧшым ашықәсқәа рзы ачемпианатқәа жәпакы рҟны аиааирақәа ҳгахьан. Еизгоу ҳкоманда аихьӡарақәа иара игәалаҟара шьҭырхуан, гәыкала дреигәырӷьон. Сергеи Уасил-иҧа Багаҧшь хашҭра иқәӡам, иахьагьы уи игәалашәара ҳацуп. Иааигәаны дыздыруаз, аус ицзухьаз зегьы ргәаҿы иара ихыҧша наунагӡа иаанхоит еицакра амамкәан», - лҳәоит Жанна Занҭариа.