Аҧсны иҟоу аҭагылазаашьа гәаҭаны, Ауаажәларратәи аполитикатәи еиҿкаарақәа реидгыла Аҧсны ахада Рауль Ҳаџьымба идыргалоит иҭыҧ аанижьырц.
Аҧсадгьыл-инфо, август 23 2018 ш. Аҧсны ахада ихаҭыҧуаҩ иҭыҧ ааныжьра Аҧсны аҳәынҭқарратә система зеиҧшроу, еиҳаракгьы азинхьчаратә усбарҭақәа рҿы иҟоу аҭагылазаашьа аанартит, аҳәоит Ауаажәларратәи аполитикатәи еиҿкаарақәа реидгыла иҟарҵаз аҳәамҭаҿы.
«Азакәан иҭагӡаны сыпату ахьчара ахьамуа азы» ҳәа Аҳәынҭқарра ахада ихаҭыҧуаҩ иажәақәа Аҧсны зҭагылоу еилыккка иунарбоит,- аҳәоит аҳәамҭаҿы. – Аҳәынҭқарраҿы аҩбатәи ауаҩы иаартны иҳәеит «маи 2014 шықәса рышьҭахь Аҧсны амҩаду уаа амчра шыргаз, дара аҳәынҭқарра ишахаҧаз».
Аоппозициа ахаҭарнакцәа уажәтәи амчраҿ иҟоу аҳәынҭқарра шеиладырҩынтыз, аҳәынҭқарра ахаҭа аҟазаарагьы ашәарҭара ишҭадыргылаз изныкымкәа ишырҳәахьаз ргәаладыршәоит.
«Ауаа рӷарра, ацәгьауцәа ирҭаху, аиҳабыра ирзааигәоу ауаа ракәзар, рхы иҭашәо аныҟарҵо аамҭа иахьа ҳҭагылоуп. Акызаҵәык аиҳабыра ирылшаз – аҳәынҭқарра ашьақәргылара шҳалшо азы ажәлар ргәыӷра ршьит.
Аҧсны – апрезиденттә ҳәынҭқарроуп. Араҟа имҩаҧысуа зегьы рзы иара иоуп аҭакҧхықәра зду. Иҟоу акризисттә ҭагылазаашьаҿы иара иҟаиҵар ауп ииашоу ашьаҿа – имаҵура ааныжьны дцар ауп», - аҳәоит адокуемнт аҿы.
Аоппозициа иазгәарҭоит ажәлар Аҧсны аиҳабыс иалырхыша дарбану рыҵаҳәара шаҭахым.
«Есымшагьы аҟәыӷара аазырҧшуаз ажәлар иалырхша раҳәара аҭахӡам. Еиҳаракгьы уи аганахьала зхы аазырҧшхьоу ауаа рҟынтәи абжьгарақәа ҳазҳадкылом. Аҧсны монархиатә ҳәынҭқарраӡам, дара рышьҭахь аӡәы даанрыжьуа», - ҳәа аҳәоит ааҧхьараҿы.
Аҧсны иҟоу аҭагылазаашьа гәаҭаны, Ҳаџьымба апрезидент имаҵура аанижьырц идыргалоит.
«Ҳара аҳәынҭқарра ахада Ҳаџьымба иахь ааҧхьара ҟаҳҵоит ижәлар пату рықәҵаны, Аҧсны аҳәынҭқарра алахьынҵа даҧеиҧшны, ахаҵара аарҧны имаҵура аанижьырц», - ҳәа аҳәоит Ауаажәларратәи аполитикатәи еиҿкаарақәа реидгыла ааҧхьараҿы.