Ауаажәларратә-политикатә усзуҩы, асахьаҭыхҩы Нугзар Лагәуа аполитикатә процессқәа ирыхҟьаны Аҧсны иҟоу аҭагылазаашьа иазкны игәҭахәыцрақәа иҩит.
«О лживых словах в Псалтири сказано: «Вот, нечестивый зачал неправду, был чреват злобою и родил себе ложь» (Пс. 7: 15). Мы видим, что ложь рождается от неприязни к ближнему, когда человек «чреват злобою» – то есть затаил неприязнь, но не решается на открытое выступление против неприятного ему человека»...
Аҧсуаа ахаангьы анцәахаҵара рылан. Анцәа ихьӡ мҳәакәа аишәа иахатәаӡомызт. Иахьагьы уи ныҟәыргоушәа иаҿуп, аха цқьа уахәаҧшыр, аформалтә ҟазшьа шамоу умбарц залшом. Уи зыхҟьо амзызқәа рацәоуп.
Иашаҵәҟьан, иахьатәи аамҭа даара уацәшәартә иҟоуп. Иахьа аҟара иҧаршеиу аамҭа ҟамлацзар ҟалап ҳара ҳҭоурыхаҿ. Убас иҟалеит, ҳаҧсҭазаара злеибарку зегьы, амц-ҧаршеи, ахаҧаны иакит.
Аинформациа ҧаршеи инаркны, еилаҟәаҟәоу афатә, ажәтә, ааглых, ахәшә-абыӷьшәы уҳәа, иааҳадыргалоу зегь ҧаршеиуп. Алаҧшхырҧага бзиа избо ахәыҷқәа реиԥш, ҳаргьы уи еилых ҟамҵаӡакәа «ҳаигәырӷьан» иҳадаҳкылоит.
Амч зку иаанда уалаимшышырц иҳадаҳкылоу «ззакәан» ҳаҩуазаргь, абжа ҧаршеиуп, тәымхәыцрала иҩуп. Ансгьы-арсгьы «атрактовка» шыҟауҵалак ауеит. Аӡбаҩцәаҵәҟьа иҟарҵоу рзымдыруа иҭанаргылоит.
Ахьшь зхы иқәсыз акәҷар реиҧш, ҳамдырра иахҟьаны ҳҷанҷаны ҳаибафоит. Ҳажәҩа ҭызҟьаз закәыҵәҟьоу еилыргашьа амоуит…
Агәаӷьра аарԥшуа, ҽыҧсахрақәак алагалара зҽазызшәарц иақәызкуа, ашҳам рыҭара ҳалагеит. Хыц-ҩыцқәак уи иаҿагыларц иаҿу, пату рықәӡамкәа, лахә-лахәы зегь рышьклаҧшуеит. Арахь, дара убарҭ «ахыц-ҩыцқәа» рҩызцәа ракәын ахаангьы ажәлар ӡырызгоз, рыхьӡ-рыҧша ҳаразкуаз.
Иахьа, амц аҽарӷәӷәеит бжьааҧнык еиҧшымкәа. Иҟоуп уи даара изгәаҧхоугьы, «зус бзиақәа» рынагӡараҿ «инструментк» аҳасаб ала зхы иазырхәо, заҧхьаҟа атыша шыззыҧшу ззымдыруа. «Ажәлар рыцҳа» анаҳҳәалоз аамҭақәа ҳхадыршҭит. Убри аҟара зегь еиларҩынтуп.
Ҳбызшәа ҳҳәару, иҳамҳәару ҳаздыруам. Ҳхәыҷқәа рыла ҭаа ҳара иҳахәаҧшуеит. Ҳаргьы иаҳҳәо ҳақәымшәо азхаз ҳақәгылан дара ҳрыхәаҧшуеит.
Арахь амцҳәаҩцәа ҳиааит… Аха иџьашьатәу урҭ ҳахьрымҵахырхәо ауп. Ус иҟамзи Асовет мчы кақәызза мцла ианазҳауазгьы. Ирҿагылоз раасҭа, ирымҵахырхәоз еиҳан. Иахьагьы уи аформа аҽамҧсахӡеит. Еиҳагьы аҽаргызмалит, «аҽарҵаулеит». Уи ауаажәларра злеибарку рдоуҳатә ҧсҭазаара, рҳәынҭқарра адақәа ирҭалан убри аҟара иаҟьашьхьеит, дарбан ҳақьыму уи ахәшәтәра иадгалатәу, иӡбахә аҳәара даара иуадаҩуп.
Уи азы, акагьы џьашьатәӡам. Ажәлар зықәшәараны иҟоу, дара рнапала иҟарҵаз, ирчаҧаз аусқәа роуп изхылҵуа. Амц иржьозаргь, уи дара рхы иаҭәаршьаз ауп. Иаархәозаргь, ирҭиуазаргь, уигьы дара роуп азин ҟазҵаз. Нас иџьашьатәума, арҭ имҩаҧысуа ахҭысқәа?
Амц ҵаҵӷәыс измоу аҳәынҭқарра, хымбгаларц залшаӡом. Аха уи аҵызхыша «адетектор» ажәлар рнапаҿоуп иахьыҟоу. Убри еилаҳкаанӡа, аҳәынҭқар иӡбаҩцәа ҳахәаӡом… Ӡбаҩыс иҟоу аӡәызаҵәык иоуп - Анцәа!
«(Мф.5: 33-37). Обычно поклясться в чем-то требуют от такого человека, у которого «да» может означать «нет» и наоборот. Господь хочет, чтобы христиане были людьми слова – «да будет слово ваше: да, да; нет, нет». А требовать с кого-то клятву означает заранее выражать ему недоверие, но если ему не доверяют, то где гарантия, что он не соврет и в клятве?»
Нугзар Лагәуа, 13.09.2019 ш.