Аамҭала Аҧсны иҟоу Урыстәылатәи аҳәаахьчацәа реиҳабы ҿыц даҭоупАлексеи Трубецкои.
Аҧсадгьыл-инфо, сентиабр 3 2018 ш. Аҳәынҭқарра ахада идикылеит Аҧсны иҟоу Урыстәылатәи аҳәаахьчацәа реиҳабыс иҟаз аинрал-маиор Дмитри Иудини уи дзыҧсахыз Алексеи Трубецкои, аанацҳауеит Аҳәынҭқарра ахада исаит.
Дмитри Иудин Аҳәынҭқарра ахада иҭабуп ҳәа еиҳәеит русеицуразы, дагьиирдырит аусбарҭа аиҳабы ҿыц Алексеи Трубецкои.
«Иара апрофессионалтә ҵара бзиа, аҧышәа имоуп. Алматы ақалақь иҟоу Ӡержински ихьӡ зху Иреиҳаӡоу акомандатә ҵараиурҭа далгахьеит. 2001 ш. рзы Афедералтә ҳәаахьчаратә академиа далгеит, аус иуан Аҩада Кавказ, Украина, Ихароу Мрагылара, уҳәа аҭыҧқәа рҿы. Аҵыхәтәаны шықәсыки бжаки иуалҧшьа наигӡон Аҧсны, еиликаауеит ара иҟоу аҭагылазаашьа», - иҳәеит Дмитри Иудин.
Аҳәынҭқарра ахада Дмитри Иудин иҭабуп ҳәа еиҳәеит иусуразы, аҧхьаҟатәи иусураҿы ақәҿиарақәа изеиӷьеишьеит.
«Аҧсны шәара аҩызцәа бзиақәа шәырҳаит, араҟа шәбара есымша ҳазҧшуп», - иҳәеит Рауль Ҳаџьымба, аанацҳауеит асаит.