Аҧсуа театр аҟны мышкы ҩ-театрк рспектакльқәа еиқәдыршәеит
Аҧсадгьыл-инфо, ноиабр 15 2018 ш. Аҧсуа театр арежиссиор Валери Ақаҩба испектакль «Шьапыла» дырбара афиша ианын ноиабр 15 асааҭ 19 рзы. Иацы Аҿар ртеатр алаҳәара ҟанаҵеит ари аҽны, убри аамҭазы дара аспектакль «Амцҳәаҩ даҭахуп» шықәдыргыло азы, ахәаҧшцәагьы ааҧхьара рырҭеит.
«Аспектакль «Шьапыла» ноиабр 15 рзы ишыдҳарбо азы афиша ианаҳҵеижьҭеи акыр ҵуеит. Аҿар ртеатр ҩымш раҧхьа аспектакль ықәдыргыларц рыӡбеит, ҳара ҳтәы иалагаанӡа сааҭыбжак шыбжьоу аамҭа адырбеит. Ари ҳара ҳаспектакль иаҧырхагахарц ишыҟарҵаз еилкаауп. П,шьынтәуп дара ари аҩыза ҟарҵоижьҭеи. Ас уаҳа иауӡом. Ҳара компромисск ҳаҧшаароуп», - иҳәеит Аҧсуа театр адиректор хада Нодар Ҷанба.
Атеатр адиректор хада ихаҭыҧуаҩ Шьарида Ҭыжәба илҳәеит аспектакль «Шьапыла» иахьа ахәаҧшцәа ишдырбахо.
«Арепетициа мҩаҧаагеит. Аспектакль аҟәыхра азҵаара ҳахәаҧшӡом», - лҳәеит адиректор хада ихаҭыҧуаҩ.