Ибрагим Цеи ихьӡ зху Адыгеиатәи амилаҭтә театр Аҟәа агастрольқәа мҩаҧысуеит сентиабр 15 инаркны 22-нӡа. Артистцәа ықәгылоит Аҧсуа драматә театр асценаҿы.
Аҧсадгьыл-инфо, сентаибр 16 2018 ш. 34 шықәса раҧхьа аншлагла имҩаҧысит Адыгеиатәи атеатр Аҧсны аҟазаара, иҳәеит Адыгеиатәи амилаҭтә театр арежиссиор Ҟасеи Хачегогу уажәазы Аҧсуа театр абжа зызмырҭәыз ахәаҧшцәа рахь ихы нарханы.
«Уаанӡа Аҧсни Адыгеиеи ртеатралтә дунеиқәа еиҧымлаӡацызт, -азгәеиҭеит иара. – Усҟан, абри асценаҿы сара исҳәеит: аҵаа ҵысит. Усҟан ауаа азал дырҭәуан ес-ҽны, ҳара ҳгәырӷьара ҳәаак амамызт. Нас иалагеит аибашьра, аамҭа хьанҭа ҟалеит. Еиҭах ҳара ҳаиҟәыҭхахеит. Абар, уажәы еиҭах ҳааит, даҽазнык аҵаа ҵысит сҳәарц азы».
Ахәаҧшҩы Аида Ладариа илгәалашәоит 34 ш. раҧхьа атеатр Аҟәа ианқәгылоз.
«Бертольд Брехт иҩымҭақәа классикоуп. Дарбан режиссиорзаалакгьы ихатәы знеишьа имоуп. Даара аинтерес сзаҵоуп уажәтәи ақәыргыламҭа. Сара сзы ихадаӡам иарбан театру - адыга, аҟабарда, аҧсуа театр, атеатралтә бызшәа универсалтәуп. Ихадоу арежиссиор изнеишьа ауп», - лҳәоит лара.
Аспектакль актәи аминуҭқәа рзы еилкаахеит иара адыгатә колорит ахаҵаны ишыҟаҵоу. Актиор азал ахь дцәырҵит еицырдыруа адыгаа рышә ахәаҧшцәа агьама дирбарц.
«Аџьма шәы агьама жәба. Ишәгәаҧхама?», - дҵаауан иара. Аиеи ҳәа аҭак аниаҳа иҳәеит: «Сара шәгәы иахәо сзыҟаҵазар, шәаргьы иҟашәҵа актиорцәа ргәы иахәаша – шәмобилтә ҭелқәа шәырцә. Ҳара ишәзеиҭаҳҳәоит акырынтә ҳзызхәыцуа ииасхьоу атәы, аџьмақәа ашьха ашьапаҿы ианҳәуаз, аџьмахш иалху ашә агьама акыр ианеиӷьыз иҟалаз аҭоурых».
Брехт ипиеса аоригиналтә версиаҿы «Кавказски меловои круг» мҩаҧысуеит Кавказтәи ареспубликақәа руак аҿы, аха усҟан иҟаз афеодалтә еизыҟазаашьақәа зегьынџьара еиҧшын.
Аспектакль асиужет еиҭамҳәакәа ҳазааҭгылоит адекорациақәа рыҭбаареи еиуеиҧшым атехникатә маругақәа рхархәареи ртәы: асценаҿы ақәа, асы ауан, аҧшасра цәгьа ыҟан, афырҧҳәызба хада ацҳа хәыҷы ала иҵаулаз аҭыбгара дахысуан, убас егьырҭгьы.
Ихадоу акакәны аспектакль иагәылсуеит аидгылара атема. Аспектакль ахыркәшамҭаз зықәрахь инеихьоу, Ан лсимволра аазырҧшуа аҧҳәыс ажәлар иралҳәоит аидгылара ада ажәлар маҷқәа адунеи иқәӡаар шауа.
«Ҳажәлар рзы сгәы ҭынчӡам. Ахәышҭаараҿы амца шҿымцәаауа, аамҭа аибафара ҳшаламӡуа, ҳбызшәа, ҳтрадициақәа, ҳҵас, ҳкультура шеиқәҳархоу азы агәра згоит. Агәра згоит ажәлар рҟәыӷара. Сара сгәыӷуеит, издыруеит, сыҧшуп! Ҳаидгылараҿы ауп ҳаӷәӷәара ахьыҟоу!», - лҳәеит лара, ахәаҧшцәа ракәзар, напеинҟьарыла ирыдыркылеит арҭ ажәақәа.
Арежиссиор Ҟасеи Хачегогу иажәақәа рыла, ари аспектакль иара акыр ҵуеит Аҧсуа театр аҿы ақәыргылара игәы иҭеикиижьҭеи.
«Аспектакль аҿы адыгеи аҧсуа актиорцәеи хәмарырц хықәкыс исыман. Ҳара ҳаиҿцаалар ауп, ҳаибабалар ауп, убасҟан ауп ҳаиҩызара акы анаҵанакуа. Ҳара аҧсшәа ҳҵеит, шәаҳзыӡырҩы сентиабр 22 рзы аспектакль «Кавказски меловои круг» аҿы. Нас Адыгеиа аҧсуа театр адыга бызшәала аспектакль ықәшәыргыларц ҳазыҧшуп», - иҳәеит Хачегогу.
Аспектакль ашьҭахь ахәаҧшцәа ирзаҧхьеит Адыгеиа акультура аминистр иааишьҭыз ашәҟәы.
«Ихьанҭаз аамҭақәа рзы ҳара шәааигәара ҳаҟан, асимволикатә ҵакы амоуп ҳтеатр агастрольқәа ареспублика ахьыҧшымра азаазгаз аиааира 25 шықәса ахыҵра иахьазку. Агәыӷра ҳамоуп арҭ агастрольқәа гәахәарыла ишәыдышәкылап ҳәа», - аҳәоит ашәҟәаҿы.
Аҧсуа театр адиректор хада Нодар Ҷанба асасцәа «Бзиала шәаабеит, хашьцәа»! ҳәа дырҧылеит.
«Ҳгәы иахәоит ҳашьцәа, ҳколлегацәа ҳтеатр аҿы иахьҳадаҳкыло. Сгәыӷуеит ас еиҧш иҟоу аиҧыларақәа ирыцҵахап ҳәа. Иҭабуп иахьа ахәмарра бзиа ҳзырбаз актиорцәа. Иҭабуп Брехт ду ипиеса иалхны аспектакль ҟәыш ықәзыргылаз арежиссиор. Ари апиеса ахықәкы хада – аидгылара ауп, уаҟа ауп ҳара ҳамчгьы ахьыҟоу. Иара Аҧсны жәлар еидызкылаз афорумгьы «Аидгылара» ахьӡын. Ҳара ҳетнос, ҳкультура еиқәҳархарц азы аидгылара ҳҭахуп», - иҳәеит Ҷанба.
Адыгеиатәи амилаҭтә театр агастрольқәа мҩаҧысуеит сентиабр 22-нӡа. Ахәаҧшцәа идырбахоит даҽа ҧшь-спектакльк.