Хьыбла Герзмаа еицырдыруа испаниатәи аоператә шәаҳәаҩы Монтсеррат Кабалие лыҧсразы акомментари ҟалҵеит.
Аҧсадгьыл-инфо, октиабр 6 2018 ш. Урыстәылеи Аҧсни Жәлар рартистка Хьыбла Герзмаа Instagram аҿы иҟоу лдаҟьаҿы Монтсеррат Кабалие лыҧсразы илыҩуеит:
«Ицоит аепоха Дуӡӡа, Ицоит ауаа Дуқәа. Монтсеррат – иҭабуп абжьы, атембр, пианиссимо, мецца-воче азы, ауаа рацәажәараҿи ибхылҵуаз аҧхарразы! Сара исгәалашәалоит Барселона ҳҽазыҟаҵарақәеи ҳаиҧыларақәеи! Лара иаанлыжьит апартиа дуқәеи арольқәеи, акариера ду! Схырхәоит».
Монтсеррат Кабалие 85 ш. шылхыҵуаз лыҧсҭазаара далҵит Барселона. 50 шықәса ицоз лкариера иалагӡаны лара иналыгӡеит 90 роли 800 камертә ҧҵамҭақәеи.
Кабалие дрыцықәгылон Леонард Бернстаин, Герберт фон Караиан, Джеимс Ливаин, Зубин Мета, Георг Солти уҳәа адирижиорцәа, убас Хосе Каррерас, Пласидо Доминго, Лучано Паваротти, Мерилин Хорн, Альфред Краус уҳәа аоператә шәаҳәаҩцәа.