Искандер ихьӡ зху атеатр ихнаркәшеит 37-тәи атеатралтә сезон аспектакль «Три высокие женшины» ала, иара убас ахәаҧшцәа рыбжьыҭира алҵшәақәа рылаҳәан.
Аҧсадгьыл-инфо, сентиабр 26 2018 ш. Џьамбул Жорданиа иреиӷьу актиорс далкаауп РУСДРАМ 37 асезон аҿы.
Уи ахәаҧшцәа рыбжьы ирҭеит Џьо Келлер ироль аспектакль «Все мои сыновиа» аҿы инаигӡо азы.
Иреиӷьу актрисас лыхьӡ ҳәан уи аспектакль аҿы ицыхәмаруа Симона Спафопуло, Кет Келлер лроль назыгӡо.
«Иреиӷьу ахаҵа ироль аҩбатәи аплан» аноминациаҿы аиааира игеит аспектакль «Все мои сыновиа» аҿы Џьорџь Дивер ироль назыгӡо Кирилл Шишкин.
«Иреиӷьу аҧҳәыс лроль аҩбатәи аплан» аноминациаҿы даиааит аспектакль «Широколобыи» аҿы еиуеиҧшым арольқәа назыгӡо актриса қәыҧш Мадлена Барцыц.
Иреиӷьу аспектакль ахәаҧшәа рыбжьҭирала - «Все мои сыновиа», уи арежиссиор Антон Киселиус далкаахеит иреиӷьу режиссиорс.
Иреиӷьу апроектс иҟалеит «Шедевры московскои сцены», уи аҳәаақәа ирҭагӡаны Аҧсны агастрольқәа рыман еицырдыруа Урыстәыла аҳҭнықалақь атеатрқәа.
РУСДРАМ адиректор иҟынтә иҷыдоу аҳамҭа ланашьан Миха Лакрба иновеллақәа рыла иҭыхыз акинофильмқәа «7 новеллак» акооридинатор, «А-Мобаил» ахаҭарнак Марҭа Ҭыжәба. Урҭ рӡыргара мҩаҧган Искандер итеатр аҿы.
Искандер ихьӡ зху атеатр 37-тәи атеатралтә сезон ахнаркәшараҿы иқәгылаз акультура аминистр Ельвира Арсалиа ахәаҧшцәа иргәалалыршәеит ииасыз асезон аихьӡарақәа, иагьаҵылшьит РУСДРАМ атәылаҿы инхо ауаа жәларбжьаратәи атеатралтә ҧсҭазаара иахәҭакны ишыҟанаҵо.
«РУСДРАМи ахәаҧшцәеи рыбжьара ишьақәгылеит аиҩызартә еизыҟазаашьақәа. Ахәаԥшцәа ирымоуп алшара иреиӷьу аспектакльқәеи актиорцәеи ралхра. РУСДРАМ инанагӡоит зыхьӡ аху Фазиль Искандер иуасиаҭ хада – аҟазареи алитературеи хықәкы хадас ирымоу, ауаҩы ицхраара, еиҳа дқьиахарц имариам аҧсҭазаараҿы», - лҳәеит аминистр.
38-тәи атеатралтә сезон аартхоит ноиабр 8 рзы аспектакль «Кьоджинские перепалки» ала.