Аҧсуа драматә театр аҿы абомба аҧшаара ианаҿыз аамҭазы Аурыс тетар аҟны имҩаҧысуан Аҧсны Аџьынџьтәылатә еибашьраан аиааира 25 ш. ахыҵра иазыз Аҳәынҭқарратә хортә капелла аконцерт.
Аҧсадгьыл-инфо, октиабр 10 2018 ш. Аконцерт аҟны инарыгӡеит аҳәаанырцәтәи аклассикцәа Франц Шуберт, Георг Фридрих Гендель, Джулио Каччини, Вольфганг Амадеи Моцарт, иара убас акомпозиторцәа Дмитри Бортниански, Нодар Ҷанба, Ражьден Гәымба, Константин Ченгелиа раҧҵамҭақәа.
«Арҭ аҧҵамҭақәа ахәаҧшцәа бзиа еицырбахьеит, дара ҳрепертуар аҿы есымша аҭыҧ рымоуп», - лҳәеит акапелла адирижиор Нора Аџьынџьал.
Аконцерт сааҭки бжаки имҩаҧысуан.Азал аҿы итәаз еихымсуаз напеинҟьарыла ирыдыркылон ашәақәа зегьы рынагӡара. Аконцерт бзиан имҩаҧысит. Ахәаҧшцәа акапелла бзиа ишырбо даҽазнык иаадырҧшит.
Акапелла асахьаркыратә напхгаҩы, адирижиор Нора Аџьынџьал РУСДРАМ адиректор хада ахәылҧаз аиҿкааразы иҭабуп ҳәа иалҳәоит.
«Ҳара ҳколлектив уаанӡагьы РУСДРАМ асценаҿы иқәгылахьан. Аспектакль «Игрок» аҿы Моцарт «Иреквием» наҳагӡон. Усҟан ахәаҧшцәа ҳақәгылара даара иргәаҧхеит. Аклассикатә музыка иазку ахәылҧаз мҩаҧаагарц азы аӡәырҩы ҳаҳәон. Аконцерттә сезон хыркәшо, уи ҟаҳҵарц ҳаӡбеит», - лҳәоит Нора Аџьынџьал.
Лара инаҵшьны иазгәалҭеит атеатр акустика даара ишыбзиоу, микрофондагьы ашәаҳәара шауа.
Акапелла аконцерт адирижиор, Аҧсны жәлар рартиска, «Ахьӡ-аҧша» аорден ахҧатәи аҩаӡара занашьоу Нора Аџьынџьал лымшира иақәшәеит.
Аҳәынҭқарратә ахортә капелла еиҿкаан 1969 ш. рзы акомпозитор Алексеи Чычба ибзоурала. Еиуеиҧшым аамҭақәа рзы акапеллаҿы адирижиор аус руан Алексеи Чычба, Ражьден Гәымба, Виачеслав Аиба, Геннади Дмитриак, Вадим Судаков, Нодар Ҷанба.
1996 ш. инаркны Нора Аџьынџьал Аҳәынҭқарратә хортә капелла асахьаркыратә напхгаҩыси адирижиор хадаси дыҟоуп. Акапелла аконцертқәа ахьымҩаҧнаго аҭыҧ хадас иамоуп Пицундатәи ауахәама. Акапелла Валери Гергиев сахьаркыратә напхгаҩыс дызмоу Москватәи амшаҧытә фестиваль ахь изныкымкәа ааҧхьара арҭахьеит.