Агәыӡера аҳаблатәи ахореографиатә ансамбль «Марыхә» алахәын XV жәларбжьаратәи ахәыҷтәы-қәыҧштә фестиваль-конкурс
Аҧсадгьыл-инфо, ноиабр 5 2018 ш. «Без границ» захьӡыз афестиваль-конкурс Санкт-Петербургтәи акультуратә аҳәынҭқарратә институт ацхыраарала имҩаҧысит.
Лери Адлеиба напхгаҩыс дызмоу ахореографиатә ансамбль «Марыхә» раҧхьаӡа акәны ари афестиваль иалахәын. «Амилаҭтә кәашара» аноминациа аҿы «Марыхә» актәи апремиа анашьан.
«Аҵыхәтәанынӡа ҳгәы иаанагомызт аҧхьахәтә ҭыҧ аагоит ҳәа. Араҟа иқәгылоз аколлективқәа зегьы даара ибзиан, ркостиумқәа цәгьала иҧшӡан. Шә-коллективк раҟара ықәгылон зынӡа афестиваль аҟны. Ҳгәырӷьара ҳәаак амамызт ҳхәыҷқәа актәи апремиа иалауреатцәахеит ҳәа анҳаларҳәа. Афестиваль аиҿкааҩцәа ахәыҷқәа аекскурсиақәа рзымҩаҧыргеит. Ҳаҟан «Петергоф», океанариум аҿы, уаҵәы аныҟәарақәа ирыцаҳҵоит. Санкт-Петербург ахәыҷқәа даара иргәаҧхеит», - лҳәеит зыҧҳа Елана илыцны афестиваль аҿы иҟоу Наталиа Бганба.