Аҧсуа литература ацәыӡ ду аиуит. 82 шықәса дшырҭагылаз иҧсҭазаара далҵит, ашәҟәыҩҩы, апублицист, Д. Гәлиа ипремиа алауреат, Аҧсни Урыстәылеи рышәҟәыҩҩцәа реидгылақәа рлахәыла Џьума Виссарион-иҧа Аҳәба. Џьума Аҳәба аҧсуа литератураҿы иҟаиҵаз алагала даара идууп. Уи иажәабжь ссирқәеи, иповестқәеи, ироманқәеи рыла ҳлитература ирбеиеит.
Иажәабжьқәа «Ҭоуӷан», «Бзоу», «Акәашамца» еиҭаргахьеит аерман бызшәа, аурысшәа, аиапон бызшәа, англыз бызшәа, афранцыз бызшәа, уҳәа атәым бызшәақәа жәпакы рахь. Иара убасгьы аурысшәахь еиҭаргахьеит еицырдыруа ироманқәа «Ашьыцҳәа», «Ахамшҭыхә». Ароман «Ахамшҭыхә» Аҧсны жәлар рџьынџьтәылатә еибашьра иазкуп. Иара раҧхьатәи адаҟьақәа инадыркны аҵыхәтәантәи аҟынӡа ианыҧшуеит аибашьраан ҳажәлар ирхыргаз агәаҟра.
Апоет Анатоли Лагәлаа иазгәеиҭоит аибашьраан Џьума Виссарион-иҧа Аҳәба иҟаиҵаз шырцәоу. Еибашьуан иҧацәа ҩыџьа. Иара ихаҭа иакәзар Гәдоуҭантәи дҧырны аибашьра амца ахьеилашуаз Мрагыларатәи афронт ахь дцоит. Аибашьцәа дрывагылан, иблала ибон имҩаҧысуаз ахҭысқәа зегьы. Иара абраҟа аӷацәа дагьырытҟәеит. Џьума Аҳәба аӷацәа дырҳәынҷеит ҳәа заҳаз аурыс интеллигенциа ахаҭарнакцәа, изныкымкәа-иҩынтәымкәа ааҧхьарақәа ҟарҵоит, иоушьҭразы ашәҟәқәа рыҩуеит аполитикцәа рыхьӡала. Ажәакала Қырҭтәыла иҭакны ирымаз доурмышьҭыр ада ҧсыхәа рымамкәа азҵаара ықәдыргылоит.
«Џьума Аҳәба ироман «Ахамшҭыхәи», иажәабжьқәа «Ҭоуӷани», «Бзоуи» рзы иара ианаршьахьеит апремиа «Дружба народов». Џьума Виссарион-иҧа идагьы уи апремиа аҧсуа шәҟәыҩҩцәа рҟынтә уаҳа аӡәгьы имаӡам», - иҳәеит Анатоли Лагәлаа.
Иара уабсгьы, аҭыҵра ианалагаз раҧхьатәи шықәсқәа инадыркны иахьа уажәраанӡа Џьума Аҳәба ажурнал «Аҟазара» редактор хадас даман.
«Џьума Аҳәба аҧсуа литератураҿы, еиҳаракгьы апроза ажанр аҿы иҟаиҵаз даара ишьардоуп. Уи иҭынха аҧсуа литература ахьтәы фонд аҿы иаанхоит. Аџьабаа ду рыдибалон аҿар. Аҟыбаҩ змоу ҳәа ииҧхьаӡоз ҩызак иаҳасаб ала дрывагылан, иахьынӡаилшоз ала ацхыраара риҭон»,- иҳәеит Анатоли Лагәлаа.