Москватәи «Спартак» азыҟаҵаҩ хадас дҟаҵоуп Олег Кононов
Аҧсадгьыл-инфо, ноиабр 12 2018 ш. Руслан Аџьынџьал Ашьапылампылтә клуб «Краснодар» даныхәмаруаз 2014/15 асезон азы Урыстәыла ачемпионат аҿы ахҧатәи аҭыҧ ргеит. Анаҩс иара акомандаҿы азыҟаҵаҩ Олег Кононов ицхырааҩыс аус иуан.
«Сгәанала, иахьазы Олег Кононов «Спартак» зегь реиҳа дақәнагоит. Сара исҭахуп иара иусура ицааирц. Иара азыҟаҵаратә процесс иҿыцу аметодикала дазнеиуеит, итактика аинтерес аҵоуп. Ихадоу – ашьапылампыл асцәа деилыркаар ауп, усҟан проблема ҟалаӡом. Иара ажәыларатә шьапылампыл ауп иаҳа игәаҧхо, аусуратә процесс ибзианы еиҿкаауп. Аҽазыҟаҵарақәа мпылда имҩаҧысӡом. Ашьапылампыл асцәа рзы иаҳа имариоуп абҩарҵәыра аасҭа ампыл кны рҽаназыҟарҵо», - иҳәеит Руслан Аџьынџьал «Life.ru» иаиҭаз аинтервиу аҿы.
Олег Кононов ашьапылампыл асцәа рацәажәашьа дшақәшәо азгәеиҭоит Аџьынџьал.
«Акомандаз ахәмаррахь ицәырҵыр зылшо ашьапылампыл асцәа 25-ҩык рсиа ыҟоуп, аха ихәмаруа 11-ҩык роуп. Убри ауп акомандақәа рҿы аконфликтқәа зегьы зыхҟьо. Ахәмарра зегьы ирҭахуп. Уи еилкаатәуп. Убри аан азыҟаҵаҩ ихы даӷаӡам, уи адәы иқәиҵо иаҳа иазыҟаҵо ахәмарцәа роуп, - азгәеиҭоит ашьапылампыл асҩы. – Азыҟаҵаҩ хада апроблемақәа иаразнак игәеиҭозар ауп, ирласны рыӡбара илшарц азы. Кононов ихаан ҳкомандаҿы проблема ҳамаӡамызт: иара - дазыҟаҵаҩуп, сара - сшьапылампыл асҩуп, зегьы аҧҟарақәа ирықәшәон. Ҳара ҳаиҩызцәан сҳәаргьы ауеит».
«Спартак» иахьазы апериод хьанҭа ишҭагылоугьы, Руслан Аџьынџьал Олег Кононов ииашан иҟаиҵеит акоманда азыҟаҵара дахьақәшаҳаҭхаз ҳәа игәы иаанагоит.
«Спартак» ахь ааҧхьара есымша иурҭаӡом. Уашьҭан уҧсҭазаара зегьы уи уазхәыцлар аасҭа, еиӷьуп уи аҩыза ашьаҿа ҟауҵар. Зегьы ҧыушәар ауп», - иҳәеит иара.
Руслан Аџьынџьал иахьазы аҵара иҵоит Иреиҳаӡоу азыҟаҵаҩцәа ршкол аҿы.
«Сара ҷыдала еиҿыркааз Глушакови, аишьцәа Комборовааи, Васеи Лиошеи Березуцкиаа, Келешини ахьыҟоу акатеогриа А агәыҧ аҿы сыҟоуп. Хымҧада, «Спартак» аҿы иҟаз издыруа рацәоуп, аха уи сызшәаҳәом», - иҳәеит Руслан Аџьынџьал.
Олег Кононов Краснодартәи акоманда хышықәса ианазыҟаиҵоз Урыстәыла деицырдыруа дҟалеит. Акоманда аҭоурых аҿы раҧхьаӡа акәны иара ибзоурала Европатәи акубокқәа рахь инеит, Урыстәыла акубок агаразы афинал аҿы ихәмаруан, Урыстәыла ачемпионат аҿгьы ахҧатәи аҭыҧ ааннакылеит.