ААР аминистр Дмитри Дбар Гагра араион аҩныҵҟатәи аусқәа рминистрра аҟны аусутә еилацәажәара мҩаҧигеит, уа ишьҭыхын аҧхын аамҭазы азинмч ашьақәргылара иахьынӡазыхиоу иадҳәалоу азҵаарақәа.
Гагра араион аҩныҵҟатәи аусқәа русбарҭа аштаб еиқәнаршәеит 2021 шықәсазтәи аҧхынтәи аҧсшьараамҭазы ауаажәларратә зин ашьақәыргыларазы, ҧсшьара иаауа ршәарҭадара аҧҵаразы аусуратә план. Ари аплан инақәыршәаны атуристтә маршрутқәа зегьы рҟны амҩа-ҧыҧшратә маҵзурақәа рекипажқәа ахархәара рыҭахоит, иара убасгьы иаҧҵахоит шьапылатәи апартульқәа, уахыи-ҽныи аусура иазыхианы еиқәыршәахоит аоперативтә-усҭҵааратә гәыҧқәа.
Дмитри Дбар иазгәеиҭеит, Гагра араион аҩныҵҟатәи аусқәа русбарҭа аусзуҩцәа даара аҭакҧхықәра ду шрыду, еиҳаракгьы акыр хылаҧшра аҭахоит акриминалтә милициеи, ауаажәларратә шәарҭадаразы амилициеи русура, дара иахьынӡалшо идырҕәҕәар ауп агәҽанҵаратә-профилактикатә усура, акурорттә аамҭазы азинеилагарақәа аҭыҧ рмоуразы.
Аминистр иара убасгьы иҳәеит, дарбанызаалак аусзуҩы асасцәа рганахьала азаанаҭдырратәи намыслатәи азыҟазаашьа ааирҧшларц шакәу. Дмитри Дбар амаҵзуратә усура аиҿкааразы адҵақәа ҟаиҵеит.
Гагра араион аҩныҵҟатәи аусқәа русбарҭа аиҟәшақәа реиҳабацәа рнапаҵаҟа иҟоу амаҵзурақәа планла ирзарбоу аусмҩаҧгатәқәа рынагӡара иахьынӡазыхиоу азы адыррақәа ҟарҵеит.