Мышқәак ҵуеит атрасса аганқәа рҿы еиқәу аҭыӡқәа рхаҳәқәа кьырла рышәра иахьаҿу азы Феисбук аҿы ауаа агәынамӡара аадырҧшуеижьҭеи.
Аҧсадгьыл-инфо, сентибар 1 2018 ш. Ауахәама аусзуҩы Дорофеи Дбар ихатәы даҟьаҿы иқәиргылеит Ешыра иршәыз амҩаду аҭӡамц ахәҭак, иагьаҵаиҩит: «Ҳамҩақәа рырҽеиразы аҭакҧхықәра зду, иаанышәкыл ари аҿаасҭара!»
Ари анҵамҭа ақәҿырҭит ауаа маҷымкәа.
«Иазусҭцәада арҭ ауаа «ҟәышқәа»? Ахазына! Ас ахәыцра зылшада?», - ҳәа анылҵеит Хьыбла Гьерзмаа.
Алиса Гыцба лакәзар иазгәалҭеит: «Ари Лиуис Керрол ирҿиамҭақәа бзиа избо ауаа роуп. Исгәалашәоит, ҳәынҭқарра шьахәк аҿы бзиа ирбон агәилқәа рышәра».
Ас ҟазҵо Гиза дахагылазҭгьы, апирамидақәа ишәуан ҳәа аӡәы агәаанагара ааирҧшит. Даҽаӡәгьы иҳәеит ианду лаандеи Аҟәа аҧшаҳәеи анишә ашьҭахь Том Соиер икьыр иманы Аҧсны далалаеит ҳәа.
Иааиуа амчыбжь азы иаҳшәыз зегьы амаҳхуеит, иҳәеит Аҧсадгьыл-инфо акорреспондент дзыҿцәажәаз «Аҧснымашьынамҩа» адиректор Борис Ачба.
«Афон Ҿыц аҟынтәи уанаауа «анхәа лыбз» ҳәа иахьашьҭоу уаннеиуа аҭӡы маҷк ҳшәит. Иалҵыз анаҳба, ҳаангылеит. Акиорхер ала иамысхуеит. Иара ақәагьы иамнахуеит, аха аамҭа иаҳа иаҭахуп, насгьы усҟан агәам ахьыкәкәа иҟалоит. Аиааира мшы ҟалаанӡа ҳахьӡоит амхра», - иҳәеит Ачба.
Иара иажәақәа рыла, Аҧсны ахьыҧшымра азхаҵара амш аламҭалаз «Аҧснымашьынамҩа» иадырҵеит атрасса дырҽеирц, иршәырц аҭӡқәа.
«Ҳара аҭӡқәа акиорхер ала иаҳрыцқьеит. Аха аҧыза-министр Гагәылиа адҵа ҳаиҭеит акьыр ала иаҳшәырц. Избанзар, аемульсиа ахә ҳамаӡам, аха исзеилымкааит иара ашәра заҭаху, - дҵаауеит Борис Ачба. – Адҵа ҳаман убас амҩадуқәа рҟынтәи агәамсам ықәаҳгарц, ацҳақәа ҳшәырц. Ԥсоу инаркны Егрынӡа 80 цҳа ыҟоуп, урҭ зегьы жәамш рыла иҳалымшеит рышәра. Убас амҩан игылоу адыргақәа ҳарҿыцырц ҳадҵан. Иҟаҳҵон, аха урҭ Урыстәыла ауп иахьыҟарҵо, уа иҿаҵаны ахә ушәаанӡа иаарышьҭӡом. Уигьы ҳахьымӡеит. Уи азы аҧыза-министр иҟынтәи лахь соуит сахьахьымӡаз азы. Ԥсоу инаркны Аҟәанӡа 104 км ыҟоуп».
«Аҧснымашьынамҩа» адиректор излаиҳәаз ала, иҟоуп аҭӡамцқәа ашәра зҭаху, аха урҭ хаҳәл а еиқәҵоу ракәӡам.
«Дорофеи дызҿу аучасток ҳаӡәӡәоит. Ҳара уаҟа ашәыга ахьаҳшьит маҷк, ҳаангылеит, ауаа ирбарц. Ргәаанагара рҳәарц. Ахаҳә аҳауа бжьыслар ауп, акраска уаҟа иаҭахӡам. Аҧыза-министри сареи ҳаицәажәаӡом хыхь исҳәаз азы, убри азы ихаҭыҧуаҩ ила исзааицҳауеит аусура иацысҵарц. Сара уаҳа урҭ аҭӡқәа сшәӡом, сусура самырхуазаргьы. Иара ицәеилагеит абордиурқәеи аҭӡамцқәеи. Дорофеи имацара иакәӡам, аҭӡамцқәа рышәра аҭахӡам ҳәа згәы иаанаго», - иҳәеит Борис Ачба.
Ачба иазгәеиҭоит Аҧсны амҩақәа ишақәнагоу рхылаҧшразы аҧара рацәа шаҭаху.
Зынӡа «Аҧснымашьынамҩа» иадҵоуп 400 км амҩа. Урҭ рахьынтә 200 ареспубликатә трасса ауп.
«Аминистрцәа реилазаара аҧара аунашьҭӡом. «Аҧснымашьынамҩа» абиуџьет аҿгьы иарбаӡам. Аҳәынҭқарра ахада ида, сгәанала, амҩақәа аӡгьы хьаас имаӡам. Аӡиас еиқәаҵәа ҳәа иахьашьҭоу, аӡы амҩа ахьыҵнаӡәӡәаауаз аҭыҧ аҿы иҳаргылеит аҭӡамц. Ауадаҩрақәа шыҟоугьы, аҳәынҭқарра ахада аҧара ҳзаиуижьит, избанзар, акурортә сезон ааиран иҟан. Амҩатә фонд аҧара иамоу амацарала «Аҧснымашьынамҩа» иҟаҵатәу аусқәа зегьы рымҩаҧгара алшом.
Цандрыҧшь инаркны Гагранӡа жәаҩа џьара амҩа тәахьеит. Уи амҩа анца, ҵаҟа аихамҩа ыҟоуп. Ажәакала, акаамеҭ!
Аҧсны ахыи аҵыхәеи еимаздо трассак ауп иҳамоу. Асурақәа рацәаны имҩаҧгатәуп, арахь ҳара акьыр ахьшьра ҳаҿуп», - иҳәеит Борис Ачба.