Аҳәынҭқарра ахада Рауль Ҳаџьымба апресс-конференциаҿы абизнесмен Геннади Санаиа иӷьычра ахҳәаа азыҟаиҵеит.
"6-тәи атаксомотортә парк" адиректорцәа реилазаара ахантәаҩы Геннади Санаиа дшырӷьычыз ауажәларра еилыркааит август 25 рзы Феисбук аҿы аноним иқәиргылаз апост ала. Уаҟа иаҳәон абизнемен август 24 рзы дшырӷьычыз.
«Аусҭҵаара иаҧырхагамхарц азы аинформациа рыларҳәом. Азинхьчаратә усбарҭақәа иахәҭоу аусқәа мҩаҧыргоит. Агәра згоит, зегьы бзиан ишыҟало», - иҳәеит Рауль Ҳаџьымба Геннади Санаиа иӷьычра азы акомментари ҟаҵо.
Апрокурор хада ицхырааҩ Даур Амҷба Аҧсадгьыл-инфо иаиҭаз аинформациа ала, август 24 2018 ш. рзы Аҟәа араион апрокуратура ашьауӷатә ус хацнаркит Ашьауӷатә кодекс 119-тәи астатиа аҩбатәи ахәҭа, ахәҭаҷқәа «а», «в», «ж» рыла. Уи бџьарла еиқәшәаз гәыҧҩык ауаа еибыҳәаны ауаҩы иӷьычра аанагоит.
Геннади Санаиа диит 1944 ш. рзы Дынхоит Москвеи Аҟәеи. Иаб еицырдыруа ашапылампыл асҩы Вальтер Санаиа дыхәмаруан Аҟәатәи, Қарҭтәи, Москватәи «Динамо» аклубқәа рзы, Лев Иашин аҧхьатәи иазыҟаҵаҩ ҳәа дыҧхьаӡоуп.