Август 16 рзы асасааирҭа «Атриум-Викториа» аконференц-зал аҿы ауаажәларратә еиҿкаарақәа рфорум мҩаҧган.
Аҧсадгьыл-инфо, август 16 2018 ш. Ауаажәларреи, аҳәынҭқарратә институтқәеи дареи реимадара ада адемократиатә ҳәынҭқарра зышьақәгылом, ҳәа иахәаҧшуеит Аҧснытәи ауаажәларратә еиҿкаарақәа.
«Аҳәынҭқарратә политика ауаажәларра адгалара иара аҳәынҭқарраҿы аҭагылазаашьа еиӷьнатәуеит, иҟоу апроблемақәа рыӡбара иацхраауеит», - аҳәоит афорум аҿы ирыдыркылаз аҳәамҭаҿы.
Уаҟа иазгәаҭоуп аибашьра ашьҭахь аҳәынҭқарратә структурақәеи ауаажәлари еицхырааны адемократиатә институтқәа ишаҧырҵаз, убри алагьы ацивилизациатә ҳәынҭқарра аргылара ауасхыр шышьҭарҵаз.
«Аҧсны аҩызцәагьы аоппонентцәагьы иазгәарҭоит иқәыҧшу ареспубликаҿы иӷәӷәоу ауаажәларратә еиҿкаарақәа шышьақәгылаз, уи ҳаамҭазтәи адемократиатә ҳәынҭқарра аргылара ауп иаанаго», - аҳәоит аҳәамҭаҿы.
Дара иазгәарҭоит Аҧсны аполитика амҽхак шыҭбаау, зны-зынлагьы ауажәларра иаарту аиҿагылара аҟынӡа ишнанаго.
«Ус иҟазаргьы, акризис ҳалҵуеит ишәарҭоу ахықә аҿы ҳнеиаанӡа. Уи зыбзоуроу аҳәынҭқарратәи ауаажәларратәи институтқәа реимадара ауп», - рҳәоит ауаажәларра рхаҭарнакцәа.
Убри азы дара агәҭынчымра рызцәырнагоит аҵыхәтәантәи аамҭазы русура ҵакы амам ҳәа аҭыҧ змоу ахәшьарақәа.
«Ауаажәларратә еиҿкаарақәа русураҿы аӡәы идгыланы акәымкәа, ихьыҧшым алкаақәа ахьыҟарҵо ауп анегативтә хәшьара зыхҟьоу», - аҳәоит аҳәамҭаҿы.
Ауаажәларратә еиҿкаарақәа рхаҭарнакцәа ирҳәоит Аҧсны иҟоу аҭагылазаашьа ахәшьара аҭара аобиективла ишазнеиуа, убри аамҭазы иҟаҵәҟоу аҭагылазаашьа абара, агхақәа ргәаҭара, урҭ рырҽеиразы амҩақәа рыдгалара ихадоу акакәны ишырыҧхьаӡо.
Абри атәы аанацҳауеит аинформациатә агентра «Абхазиа-Информ».
Афорум аҿы ажәахәқәа рыла иқәгылеит Зураб Ачба ихьӡ зху Аҵарадырратә центр «Адунеи қәымчрада», Агуманитартә программақәа рцентр, Аҧсны аҳәса рассоциациа рхаҭаранкцәа.