Ари азҵаареи Москватәии Константинопольтәии апатриархиақәа реизыҟазаашьеи еидаҳәалаӡам, рҳәеит РПЦ аҟны.
Аҧсадгьыл-инфо, октиабр 16 2018 ш. Иҧшьоу амца мшаҧазы Иерусалимнтәи Урыстәылаҟа аагараҿы ҧырхага ҟалаӡом, аха Аурыси Константинополи рпатриархиақәа реимадара анааныркыла ашьҭахь уатәи ауахәамақәа рҟынтәи аҧшьа маҭәарқәа Урыстәылаҟа раагара залыршахом ааигәатәи аамҭазы, ҳәа аҳәамҭа ҟаиҵеит Москватәи Урыстәылазегьтәии апатриарх ипресс-маҵзуҩы Александр Волков ТАСС акорреспондентцәа аниҿцәажәоз.
«Иҧшьоу амца Иерусалимнтәи, Иерусалимтәи апатриарх иҟынтәи иааргоит. Ари азҵаареи Москватәии Константинопольтәии апатриархиақәа реизыҟазаашьеи еидаҳәалаӡам», - иҳәеит Волков.
Октиабр 15 рзы РПЦ иҧшьоу Асинод алахәылацәа аҳәамҭа ҟарҵеит уажәшьҭарнахыс Константинопольтәи апатриархати дареи реимадара шзалмыршахо азы.