Сентабр 4 инаркны 7-нӡа Урыстәылеи Аҧсни ркультура аминистррақәа рыцхыраарала Аҧсны имҩаҧысуеит Ингуштәыла акультура амшқәа.
Аҧсадгьыл-инфо, сентиабр 6 2018 ш. Апрограмма иалоуп еиуеиҧшым аусмҩаҧгатәқәа. Урҭ ирыбзоураны аингушцәа рҭоурых, ркультура, ршәаҳәаратәи рыкәашаратәи ҟазарақәа рбарц Аҧсны жәлар алшара роуеит, аанацҳауеит Аҧсны акультура аминистрра асаит.
Сентиабр 5 рзы Аҳәынҭқарратә музеи аҿы аҿыханҵатә ҟазареи аингушцәа рмилаҭтә костиумқәеи, алитературеи, аҭоурыхи, аетнографиеи ртәы зҳәо ацәыргақәҵа мҩаҧган. Ингуштәыла жәлар рсахьаҭыхҩы Мусса Мартазанови асахьаҭыхҩы Зарема Галаевеи амастер-класс мҩаҧыргеит.
Убри аҽны Аҳәынҭқарратә филармониаҿы имҩаҧысит Руслан Гадаборшев напхгара зиҭо Аҳәынҭқарратә акәашаратә ансамбль «Ингушетиа» аконцерт. Ахәаҧшцәа иддырбеит иреиӷьу ахореографиатә қәыргыларақәа.
Сентиабр 6 рзы ансамбль «Ингушетиа» аконцерт мҩаҧысуеит Очамчыратәи Акультура ахан аҿы.
Ингуштәыла Ареспублика акультура амшқәа Аҧсны имҩаҧысуеит сентиабр 7-нӡа.