Аԥсны Аҳәынҭқарра акультура аминистр Гәдиса Агрба лиубилеи лыдиныҳәалеит Аԥсны зҽаԥсазтәыз артист, Аҳәынҭқарратә ахәыҷтәы хореографиатә ансамбль «Абаза» асахьаркыратә напхгаҩы Циала Иван-иԥҳа Ҷкадуа.
«Ҳаԥсуа хореографцәа инарылукааша, шәара шәыԥсҭазаара зегьы аԥсуа сцена иазышәкит. Шәҟазара ҳаракы иабзоураны, ахореографиа абызшәала шәара ишәылшоит ҳажәлар рмилаҭтә ҟазшьа, рҷыдара, ртемперамент асценаҟны аарԥшра.
Ҳажәлар аибашьра амцабз ианалагылаз иаԥышәҵаз ахәыҷқәа рансамбль «Абаза» иахьа уажәраанӡагьы ахәыҷтәы нсамбльқәа иреиӷьу ирхыԥхьаӡалоуп. Ансамбль аҟазара ҳаракы азгәаҭо, жәларбжьаратәи афестивальқәа рҟны акырынтә аԥхьахәқәа анаршьахьеит. Уи аҵак ду амоуп ҳаԥсуа культура аҳәаанырцә аӡыргаразы. Шәара ишәылшеит ахәыҷқәа ахореографиатә ҟазара ашҟа агәыбылра дыркра. Шәџьабаа иабзоураны аӡәырҩы шәоушьҭымҭацәа анаҩс рыԥсҭазаара аҟазара иадырҳәалеит, иахьагьы аихьӡара бзиақәа аадырԥшуеит ҳҳәынҭқарратә ансамбльқәа рҟны», - аҳәоит адныҳәалараҿы.
Гәдиса Агрба аиубилиар илзеиӷьеишьеит агәабзиара, агәеизҳара, лыгәҭакқәа зегьы рынагӡаразы алшара, аанацҳауеит Акультура аминистрра апресс-маҵзура.
