Аԥсны Жәлар рышәҟәыҩҩы Алықьса Гогәуа азин ҟаиҵеит С. Ҷанба ихьӡ зху Аԥсуа ҳәынҭқарратә драматә театр аҟны ироман «Асду» ала аспектакль ақәыргыларазы. Уи нап аркхоит иаарласны, аанацҳауеит Аԥсуа ҳәынҭқарратә драматә театр
Атеатр адиректор хада Алхас Ҷолокәуа инапы аҵаиҩит арольқәа реихшаразы адҵа. Аспектакль ықәлыргылоит Аԥсуа театр арежиссиор, Аԥсны зҽаԥсазтәыз артист Мадина Аргәынԥҳа. Аинсценировка еиқәлыршәеит, дышқәыԥшугьы жәларрыбжьаратәи афестивальқәа рҿы аԥхьахәқәа ираԥсахахьоу аԥсуа сценарист Занда Какалиаԥҳа.
«Ҳәара атахыума, аԥсуа литератураҿы лымкаала аҭыԥ аанызкыло, афилософиатә ҵак ду змоу Алықьса Гогәуа ироман асценахь аиагара аҽазышәара гәыӷьыуацәоуп, аха иагьҭакԥхықәра ҳаракыуп. Агәра ҳгоит аԥышәа змоу арежиссиори, зҟазарала еснагь шәгәы шьҭызхуа ҳактиорцәеи ишрылшо атеатр арепертуар аҿы зхатә ҭыԥ аанызкыло, ахәаԥшцәа ргәы иақәшәо аспектакль ақәыргылар», - аҳәоит Аԥсуа театр аинформациаҿы.