Очамчыра араион Абыргцәа рхеилак аҧшьгарала араион ахадареи араион апрокурори алархәны имҩаҧысит ҳтәыла аҩныҵҟа акриминогентә ҭагылазаашьа иазкыз аилацәажәара.
Аилацәажәараҿы иазгәаҭан аҵыхәтәантәи ашықәсқәа рзы Урыстәылатәи Афедерациа атәылауаа рганахь ала Аҧсны аҭыҧ змоу ацәгьоурақәа агәҭынчымра ӷәӷәа шцәырырго.
Абыргцәа рықәгылараҿы лымкаала иазааҭгылан аҵыхәтәантәи аамҭазы иҟалаз Урыстәыла атәылауаа ҩыџьа рышьра.
Ҳара ҳганахь ала, ас еиҧш ахымҩаҧгара иҭышәынтәалоу аполитикатә еизыҟазаашьақәа анырра арҭар алшоит ҳәа азгәаҭан Очамчыра араион абыргцәа реилатәараҿ.
Ахеилак ахантәаҩы Аполлон Думаа иазгәеиҭеит аҵыхәтәантәи амза иалагӡаны мацара ҩыџьа Урыстәыла атәылауаа шҭархаз.
Хәышықәса раҧхьа нхараҳәа зҭаацәа зманы Аҧсныҟа иааз, Тамшь ақыҭан инхоз Михаил Маслов дҭархан ианар 13 ауха. Урыстәылатәи абизнесуаҩ Михаил Еваленко имашьына арҭҟәацгала иҧыржәеит ианар 15 рзы Лӡаа ақыҭан. Ас еиҧш ахҭысқәа аанкыламзар ада ҧсыхәа ыҟаӡам. Аха ари аус аҿы азакәан иахылаҧшуа реиҧш ауаажәларрагьы ацхыраара ҟарҵароуп, ҳәа агәаанагара имоуп Очамчыра араион абыргцәа рхеилак аиҳабы.
Аиҧылараҿы иқәгылоз зегьы еицҿакны иазгәарҭон ари аҩыза ацәгьоура ҟазҵаз, акагьы иалаҳәамкәа ауаа рыҧсҭазаарақәа рҿахҵәара згәаӷьыз ауаажәларразы ишшәарҭоу.
Очамчыра араион ахада Гиви Допуа иқәгылараҿы иазгәеиҭеит абыргцәа раҧшьгарала имҩаҧгаз ари аизара аҩыза иҵегь акырынтә аиҿкаара ахәҭаны ишиҧхьаӡо.
Издыруада аиҳабацәа иҟарҵо алабжьара аҿар рҟынӡа инеины, иархәыцыр, ҳәа азгәеиҭеит араион ахада. Аилатәараҿы иазгәаҭан ас еиҧш аиҧыларақәа хара имгакәа араион ақыҭақәа рҿгьы ишымҩаҧгахо.
афото: go-abxazia.ru