Авторизация:

Ирина Кәакәасқьыр: аишәа чыс иахаршәалаз аҧарала аҧсуа бызшәа ҟалаӡом

Ирина Кәакәасқьыр: аишәа чыс иахаршәалаз аҧарала аҧсуа бызшәа ҟалаӡом
скриншот: Апсны.иахьа
19 июля 2019 10:17 1008
Апсадгьыл-инфо, 19 июля 2019 г.  

Абри атәы лҳәеит Апедагогикатә институт адиректор Ирина Кәакәасқьыр Ауаажәларратә палатаҿы имҩаҧгаз, аҧсуа бызшәа проблемақәа ирызкыз аилацәажәараҿы.

Лара лажәақәа рыла, иҟоу аҭҵаарақәа рыла, «ҳгәы ҭызго ҳәа акагьы ыҟаӡам».

«Иахьатәи ахәыҷы аҧсуа бызшәа акагьазы аинтерес имаӡам. Ԥсышәала ашәа дазымӡыҩруазар, ашәҟәы дамыҧхьозар, амультфильм имбазар, ҧсышәала ишьҭихыз атехнологиа аганахьала аинформациа имоузар, шәара шәазхәыц уажәшьҭа, 10-15 шықәса рнаҩс ҳаҧсуа бызшәа шыҟало», - лҳәеит Ирина Кәакәасқьыр.

Лара иазгәалҭеит аҧсуа абызшәа аҿиаразы абиуџьет аҟынтәи ирхашәалаз ҧарак шазоурышьҭуа.


«Абиуџьет илахәаҧшны, аӡәгьы игәы иалымсааит, аха ачынуаа рхарџь иахашәалаз, рмашьына иахашәалаз, абанкет иахашәалаз аҧарақәа, абри аҧсуа бызшәазы аӡәы акы имҳәандаз ҳәа ҧара хәыҷқәак азоурыжьуеит. Аха, абас аишәа чыс иахаршәалаз аҧарала аҧсуа бызшәа ҟалаӡом 10 шықәса, 15 шықәса рнаҩс», – лҳәеит Апедагогикатә институт адиректор.

Ирина Кәакәасқьыр илҳәеит иахьа аҧсшәа бзиан иахьырдыруа аҭаацәарақәа рҿгьы аҳәара ишаҟәыҵыз. Иазгәалҭеит уи зыхҟьоу ҳхәыҷқәа ҳзааӡандаз, акрырҿаҳҵандаз ҳәа аҭаацәа ахьеилахоу ауп.

Лара илҳәеит хышықәса аҳәынҭқарратә хәыҷбаҳчақәа рҿы ахәыҷқәа аҧсшәа шыддырҵогьы, нас ашкол аҿы алагарҭатә классқәа рҿы ишырҵогьы, ашколхәыҷқәа аҧсшәа рыздырӡом.

«Зынӡа 7 шықәса ҧсышәала аҵара рҵоит. Аха егьа ус акәзаргьы, аҧсуа бызшәа рыздырӡом. Ус акәзар, азнеишьақәа иашаӡам», - ҳәа дахәаҧшуеит Ирина Кәакәасқьыр.

Иазгәалҭеит ашкол аҿы арҵаҩцәа иршырцәыцәгьоу аурокқәа рымҩаҧгара, избан акәзар, 35-40-ҩык ахәыҷқәа ахьтәоу аклассқәа рҿы хәҩык раҟара роуп аҧсшәа здыруа.


«Ишҧаҟоу ҳарҵага шәҟәы, иахыбзҳәаауеи ҳәа арҵаҩык ҳанлазҵаа, анализ злаҟасҵои, инеиз рахьынтә хәҩык аҧсшәа рдыруеит, егьырҭ «утәа», «угыл», «уааи» рыздырӡом лҳәеит. Нас апрограмма иаҳәоу злаҟалҵои арҵаҩы?- лҳәеит Ирина Кәакәасқьыр. - Нас ҿырҳәала, дара гәаҟуа, ҳара ҳақәгәамҵуа, ҳазегьы ҳаиҿыхо, апроблема алхны, анерв алхны иҟалеит. Ҳбызшәа иахьа аӡәгьы игәы азҭамкәа иҟаҳҵеит».


Ирина Кәакәасқьыр иазгәалҭеит абызшәа анегатив алымхыкәа адунеи аҿы егьырҭ ажәларқәа ишыҟарҵаз еиҧш, аҧеиҧш шаҭатәу, иресурсны ишыҟаҵатәу аҵараҿы, аҧарарҳараҿы, ауалафахәаҿы, акарьера аҟаҵараҿы.



Для того, чтобы оставить свой комментарий, Вам необходимо авторизоваться!
Авторизация:
 
Текст сообщения*
Перетащите файлы
Ничего не найдено
Защита от автоматических сообщений