Сынтәа аамзы ирылагӡаны Аҧсны иҟалеит 529 цәгьаура, урҭ рахьынтә 73 процент иреиҳаны иаартуп.
Аҧсадгьыл-инфо, сентиабр 5 2018 ш. Абри аамҭа иалагӡаны ҩыџьа ауаа рӷьычит – абизнесменцәа Максим Иаковлеви Геннади Санаиеи. Абри атәы иҳәеит Аҧсуа телехәаҧшра аинтервиу азҭаз аҩныҵҟатәи аусқәа рминистр Гарри Аршба.
«Ари аамҭа иалагӡаны ҩыџьа ауаа рӷьыӷчит. Уи Аҧсны мацара акәымкәа уи анҭыҵгьы арезонанс аиоуит. Иахьазы Ашьауӷатә ҧшааразы аусбарҭа аусзуҩцәеи Апрокуратруа хада аусзуҩцәеи аус аҭҵааразы иаҿуп, аха макьана аус аартра алымшац», - иҳәеит Гарри Аршба.
Аминистр иажәаақәа рыла, ацәгьаурақәа раарҧшра анаҩсгьы ихадоу акакәны аминистрра аҿаҧхьа иқәгылоуп иара ацәгьаурақәа ралмыршаразы апрофилактикатә усқәа рымҩаҧгара. Иаҳаракгьы анаркотикатә маҭәашьарқәа рхархәареи урҭ раларҵәареи рганахьала.
«Аҧсны атерритоиаҿы анаркотикқәа ҟамларц азы ҳара иҳалшогьы иҳалымшогьы ҟаҳҵароуп. Уи ахырхарҭала иҟаҵоу аусқәа маҷым – ашколқәа рҿы ахәыҷқәа ирзеиҭарҳәоит анаркотикқәа ауаа ишырҧырхаго атәы, убас ауаажәлар алархәны араионқәеи ақалақьқәеи рҿы еиуеиҧшым аусмқәа мҩаҧыргоит, аха уи азхом ҳәа исыҧхьаӡоит», - иҳәоит аминистр.
Иара иазгәеиҭоит Аҩныҵҟатәи аусқәа рминистрра аусураҿы иҧсахтәу шырацәоу.
«Иҧсахтәу рацәоуп, ириашатәу рацәоуп, ишьақәыргылатәугьы убас. Зегь реиҳа ихадоу – анаркоманиеи анаркотикатә маҭәашьарқәа раларҵәареи, еиҿкаау ацәгьауреи рҿагылара ауп», - иҳәеит Гарри Аршба.