Аҧсны ахада инапынҵақәа назыгӡо Бадра Гәынба Аҧсны Жәлар рышәҟәыҩҩы Алықьса Гогәуа имшира идиныҳәалеит.
Адныҳәалараҿы иаҳәоит: «Ҳаҭыр зқәу Алықьса Ноча-иҧа!
Аҧсуа жәлар насыҧс ирыман амилаҭ-хақәиҭратә қәҧареи асахьаркыратә литература арҿиареи рус аҟны аҧхьагылаҩцәа ируаӡәку - Алықьса Гогәуа еиԥш иҟоу аҧсуа етнокультуратә ҭоурых аҿы ишьақәгылаз, анаҩс адунеизегьтәи алитература зҭынха лаша алазгалаз арҿиаҩ ду, ауаажәларратә усзуҩы дахьрылиааз.
Акыр иаҧсоу Алықьса Ноча-иҧа! Ҳажәлар рлахьынҵеи рҧеиҧши еснагь гәыҵхас измаз, уи азы хамеигӡара зуаз ахатәрақәа рыгәҭаны, Аҧсны аҭоурых ианҩылоуп шәыхьӡ-шәыҧша ҳаракы. Ҳажәлар рзы уи гәеизҳароуп, гәадуроуп, иагьхьӡырҳагоуп.
Шәира амш аҽны, ҷыдала ишәзеиӷьаҳшьарц ҳҭахуп агәамч, ақәранҵыра наӡа, арҿиаратә гәазыҳәара.
Ҳгәыӷуеит есааира адунеи иалаҵәо шәаԥҵамҭа шьахәқәа ирыбзоураны аԥсуа милаҭ ԥсра-ӡра ақәымкәа, егьырҭ ажәларқәа ирылагылазаауеит ҳәа!
Ҽаанҧшӡала шәнеилааит!»