Авторизация:

Аусураҿы деиҳабын, аусура анҭыҵ дҩызан - Валери Логәуа иҩызцәа дыргәалашәоит

Аусураҿы деиҳабын, аусура анҭыҵ дҩызан - Валери Логәуа иҩызцәа дыргәалашәоит
фото: Sputnik Абхазия
25 мая 2020 17:15 822
Апсадгьыл-инфо, 25 мая 2020 г.  

Маи 26 рзы аҵыхәтәантәи имҩахь днаскьаргоит 79 шықәса дшырҭагылаз зыҧсҭазаара иалҵыз Аҧсны абҩарҵәыреи аспорти зҽаҧсазтәыз русзуҩы, аорден «Ахьӡ-аҧша» ахҧатәи аҩаӡара занашьоу Валери Андреи-иҧа Логәуа.

Аҟәатәи аинститут афизико-математикатә факультет иалгахьаз Валери Логәуа 1981 ш. инаркны иҧсҭазаара аспорт иадҳәалахеит. Иара Аҧснытәи аминистрцәа реилазаара аҟны абҩарҵәыреи аспорти рзы аилак аиҳабыс дҟарҵоит. 13 шықәса араҟа иусура иабзоураны аспорт аҿиаразы иҟаиҵаз рацәоуп. Иара ацхыраара ду аиҭон СССР ачемпионат аҩбатәи, нас актәи алигаҿы ихәмаруаз Аҟәатәи ашьапылампылтә команда «Динамо».


«Ҳара даҳцәыӡит ауаҩы хазына, аспорт знапы алакыз, бзиа избоз. Валери Андреи-иҧа Логәуа убриаҟара аусураҿы дманшәалан, 39 ш. ҵуеит аспорткомитет аҿы аус зуеижьҭеи, иара исирҵаз ауп саазго иахьанӡа. Дуаҩы маншәалан, акрыздыруаз уаҩын, даара авторитет иман. Усҟан аицлабрақәа рацәаны имҩаҧаагон, 45 спорт хкы ҳаман, ашҟәы ҳамҩыкәан абилетқәа ҳарҭомызт, асасааирҭахь ҳнарышьҭуамызт, ицәгьан иаарласны аиҿкаарақәа, аха иара инапы зҵаҩу ашәҟәы анырбалак, уи ишҧаизыҟаҳамҵо ҳәа иаразнак зегьы рыӡбон, ҳамҩа аартын», - лҳәоит дышқәыҧшӡаз Валери Логәуа аус ицура иалагаз Аҳәынҭспорткомитет аҟны аспорт ҟәша аиҳабы Жанна Занҭариа.

Аибашьра ашьҭахгьы Валери Логәуа иусура иациҵеит. 1996 ш. рзы еиҿкаан амҵәышәымпыл азы Афедерациа, уи президентс иамаз Сергеи Багаҧш ихаҭыҧуаҩыс дҟалеит Валери Логәуа. Иара данқәыҧшызгьы амҵәышәымпыл дасуан. Уи ашықәсқәа раан амҵәышәымпыл аҿиара аиуит, Аҧснытәи акоманда Аладатәи Афедералтә округ ачемпионат аҿы ақәгылара иалагеит.

1997 ш. рзы ашколхәыҷқәа рыбжьара ашьапылампыл азы ачемпионат амҩаҧгара аҧшьигеит, уи иахьагьы имҩаҧысуеит.

2000 ш. рзы Ареспубликатә-хәыҷтәы спортшкол директорс дарҭоит. Иара ибзоурала араҟа иахьынӡауа аремонт ҟаҵан, жәларбжьаратәи аицлабрақәа рымҩаҧгара иалагеит.


«Аспортшкол аҿы еиҳарак аҿар роуп аус зуаз. Даара бзиа дырбон. Аицлабрақәа имҩаҧыргоз зегьы инапы адкылан. Амҵәышәымпыл азы Аладатәи Афедералтә округ аҿы ҳаныхәмаруаз, инапы злакыз рацәан. Аспортшколаҿы иҟан аспорт хкқәа рацәаны - ашьапылампыл, амҵәышәымпыл, атеннис, атеннис ду, уҳәа убас иҵегьы. Убарҭ зегьы инапаҵаҟа иҟан. Аусураҿы дҳаиҳабын, иҟазшьа ҽакын, аусура анҭыҵ дуҩызан, дуашьан. Аусураҿы ҳшәыцәшәоит, аусура анҭыҵ шәаҳҩызоуп, иашьеиҳабык еиҧш шәаҳзыҟоуп ҳәа иасҳәон Валери Андреи-иҧа. Даара иаҳирҵаз рацәоуп. Ауаҩы хазына даҳцәыӡит», - илгәалалыршәоит Жанна Занҭариа.

Аҵыхәтәантәи ашықәсқәа рзы Валери Логәуа Аспорттә-агәабзиарахьчаратә комплекс «Динамо» адиректор инапынҵақәа наигӡон.





 

Для того, чтобы оставить свой комментарий, Вам необходимо авторизоваться!
Авторизация:
 
Текст сообщения*
Перетащите файлы
Ничего не найдено
Защита от автоматических сообщений